काठमाडौं । नेपाल राष्ट्र बैंकका गभर्नर महाप्रसाद अधिकारीले सोमबार वाणिज्य बैंकका प्रमुख कार्यकारीसँग छलफल गरेका छन् । वित्तीय क्षेत्रमा देखिएका समस्याका बारेमा राष्ट्र बैंकले बैंकका सीईओहरूसँग छलफल गरेको थियो।
होटल याक एण्ड यतीमा भएको छलफलमा सबै वाणिज्य बैंकका प्रमुख कार्यकारी प्रमुखहरु सहभागी थिए । छलफलमा गभर्नर अधिकारीले बैंकहरुको खराब ऋण र रिकभरीका बारेमा चासो राखेका थिए ।
पछिल्लो समय खराब कर्जा केही बढेको वा बढ्ने अवस्था भएपनि बैंकहरु समस्याग्रस्त बन्ने अवस्था नरहेको भन्दै निर्धक्क भएर बैंकिङ सेवा दिन बैंकहरुलाई आग्रह गरेको छलफलमा सहभागि एक बैंकरले बताए ।
गभर्नर अधिकारीले वित्तिय संस्थामाथिको विश्वसनियता नै प्रमुख कुरा भएको भन्दै निक्षेपकर्तालाई कुनै समस्या हुन नदिने विश्वास बैंकरले दिलाउनुपर्नेमा जोड दिएका थिए । बैंकरहरुले पनि निक्षेपकर्ताको निक्षेप सुरक्षित राख्न आफूहरु तयार रहेको बताएका थिए ।
कार्यक्रममा राष्ट्र बैंकका गभर्नर महाप्रसाद अधिकारीले अर्थतन्त्र सुधारतर्फ लागेको तर दबाबमुक्त नभएकाले सचेत भएर अघि बढ्नुपर्ने बताएका थिए।
त्यस्तै, बैंक तथा वित्तिय संस्था विरुद्ध उद्योगी व्यवसायीको आन्दोलनसँगै केही अराजकता बढेको विषयमा छलफलमा जानकारी गराएका थिए।
राष्ट्र बैंकले केही राहतको संकेत दिने अपेक्षाका साथ छलफलमा सहभागी भएका बैंकरलाई गभर्नरले कुनै नीतिगत परिवर्तनको वा राहतको संकेत गरेनन् ।
वि.सं.२०७९ चैत १४ मंगलवार ०९:३४ मा प्रकाशित