काठमाडौं । दोल्ती पावर कम्पनीको आइपीओमा १ अर्ब ४७ करोड ६२ लाख २६ हजार रुपैयाँको आवेदन परेको छ ।
सीडीएसका अनुसार वैशाख ३ गते अन्तिम दिनसम्म १३ लाख ३९ हजार ४४० जनाले ९४ लाख ५४ हजार ३६० कित्तका लागि आवेदन दिएका छन् । यो सर्वसाधारको लागि बिक्री खुला गरिएको कित्तालाई आधार मान्दा ११.६० गुणा बढी आवेदन हुन आउँछ ।
त्यसकारण, यसमा १ लाख २७ हजार १८६ जनाले मात्र सेयर हात पार्नेछन् । बाँकी ११ लाख ४४ हजार ६७५ जना भने आइपीओ पाउनबाट बञ्चीत हुनेछन् ।
कम्पनीले चैत २८ गतेदेखि १ करोड ७ लाख २९ हजार ८ सय रुपैयाँ बराबरको आइपीओ जारी गरेको थियो ।
यसअनुसार कम्पनीले प्रतिकित्ता १०० अंकित मूल्यका दरले १० लाख ७२ हजार ९७२ कित्ता साधारण सेयर निष्कासन गर्ने छ । यो मध्ये ५ प्रतिशत अर्थात् ६८ हजार १७ कित्ता सामूहिक लगानी कोषलाई छुट्याइएको छ भने १ लाख ७ हजार २९८ कित्ता साधारण सेयर वैदेशिक रोजगारीमा रहेका नेपालीहरुका लागि बाँडफाँड गरिसकेको छ ।
बाँकी १२ लाख ७१ हजार ८६१ कित्ताका लागि सर्वसाधारणले आवेदन दिन सक्ने व्यवस्था थियो ।
वि.सं.२०८० वैशाख ४ सोमवार ०६:१९ मा प्रकाशित
