धादिङ, वैशाख २८ । नुवाकोट र धादिङ सिमानामा पर्ने गल्छी गाउँपालिका–८ निबुवाबोट अवरुद्ध सडक सञ्चालनमा आएको छ ।
स्थानीय शानदार होटलमा खाना खाएर रकम तिर्ने विषयलाई लिएर विवाद हुँदा सोही होटलका निरज पण्डितले चक्कुले हानेपछि उपचारको क्रममा सोही ठाउँका विनोद मगरको मृत्यु भएको थियो । पीडित पक्ष, गाउँले र प्रहरी मिलेर दोषीलाई कारबाही गर्ने र क्षतिपूर्ति उपलब्ध गराउने सहमतिपछि अवरुद्ध गल्छी–त्रिशूली सडक खण्डमा यातायात सञ्चालनमा आएको जिल्ला प्रहरी कार्यालय धादिङले जनाएको छ ।मगरको मृत्युपछि आक्रोशित गाउँलेले पण्डितको घर जलाउन लागेपछि प्रहरीले हवाई फायर समेत गरेको थियो ।
बुधबार राति ११ बजे शानदार होटलमा खाना खाएपछि विनोद मगरसहित ३ जनाले १५ सय रुपैयाँ तिरेका थिए । यसअघिको पैसा नतिरेको भनेर साहुनी सरस्वती पण्डितसँग विवाद भएको थियो । त्यसपछि सरस्वतीले सुतिसकेको छोरा निरजलाई बोलाएकी थिइन् ।
उनले चक्कु प्रयोग गरेका थिए । पछि मगरको शरीरमा मोटरसाइकल समेत गुडाएको प्रत्यक्षदर्शीले बताएका छन् । गाउँलेहरूले विनोदको उपचारको लागि काठमाडौं पठाएका थिए । उनको काठमाडौंमै मृत्यु भएपछि गाउँले झन् आक्रोशित बनेका थिए । त्यसपछि गाउँलेले विरोधस्वरुप सडक बन्द गराएका छन् ।
प्रहरीले सरस्वती र निरज पण्डित र सोही होटलमा बसेका दुई पुरुष र दुई महिला समेतलाई पक्राउ गरी कारबाहीको दायरमा ल्याइसकेको जिल्ला प्रहरी कार्यालय धादिङका प्रमुख तथा एसपी गौतम मिश्रले जनाएका छन्
वि.सं.२०८० वैशाख २८ बिहीवार १४:१२ मा प्रकाशित
