काठमाडौं । नेपाल धितोपत्र बोर्ड (सेबोन)ले व्यापाक चलखेल देखिएको घोराही सिमेन्ट इन्डस्ट्रीको आईपीओ निष्कासनको सम्पूर्ण प्रक्रिया स्थगन गरेको छ।
सेबोनले आज एक सूचना जारी गर्दै घोराही सिमेन्टको र्आपीओ निष्कासनको सम्पूर्ण प्रक्रिया स्थगन गरेको हो। ‘जाँचबुझका लागि हाललाई घोराही सिमेन्ट इन्डस्ट्रीको सार्वजनिक निष्कासनको सम्पूर्ण प्रक्रिया स्थगन गर्ने निर्णय भएको छ ।
‘निष्कासन तथा बिक्री प्रबन्धकत्वमा सार्वजनिक निष्कासन भएको घोराही सिमेन्टलाई प्रदान गरेको इस्युअर रेटिङ, क्रेडिट रेटिङ नियमावली, २०६८ को नियम ३४ को उपनियम ९२० विपरित भए नभएको बारेमा केयर रेटिङ नेपाल लिमिटेडलाई ३ दिनभित्र स्पष्ट गरी पेस गर्न २०६० जेठ ३० गतो पत्राचार गरिएकोमा केयर रेटिङ नेपाल लिमिटेडले हालसम्म जानकारी पेस नगरी कुनै आधार बिना म्याद थपका लागि अनुरोध गरेका साथै उक्त कम्पनीको सार्वजनिक निष्कासनमा मागभन्दा बढी कित्ता सेयरका लागि आवेदन प्राप्त भइसकेको अवस्थामा समेत सार्वजनिक निष्कासनको समयावधि थप गर्न सूचना प्रकाशित गरेको देखिएको सन्दर्भमा सर्वसाधारण लगानीकर्ताको सुरक्षा तथा हित संरक्षणलाई मध्यनजर गर्दै उक्त कम्पनीको रेटिङ र सार्वजनिक निष्कासनसम्बन्धी कैफियतको जाँचबुझका लागि हाललाई घोराही सिमेन्टको सार्वजनिक निष्काशनको सम्पूर्ण प्रक्रिया स्थगन गर्न निर्णयानुसार जानकारी गराइन्छ’, सूचनामा भनिएको छ ।
कम्पनीले आइपीओमा माग भन्दा पनि बढी कित्ता आवेदन परेको अवस्थामा समेत समयावधि थप गर्न सूचना प्रकाशित गरेको छ । सोही सन्दर्भमा बोर्डले लगानीकर्ताको सुरक्षा तथा हित संरक्षणलाई मध्यनजर हाललाई आइपीओ निष्काशनको सम्पूर्ण प्रक्रिया स्थगन गरेको हो ।
वि.सं.२०८० असार ४ सोमवार १६:१० मा प्रकाशित
