काठमाडौं । विकास बैंकहरुले दिगो विकासमा योगदान दिने उद्देश्यले ‘हरित निक्षेप योजना’ र ‘हरित कर्जा योजना’ ल्याउने भएका छन् ।
बैंक तथा वित्तीय संस्थाहरुको लगानी तुलनात्मक रुपमा कम उत्पादनशील क्षेत्रमा बढ्दै गएकाले उत्पादनमूलक र दिगो विकासमा टेवा दिने क्षेत्रमा कर्जा बढाउने उद्देश्यले डेभलपमेन्ट बैंकर्स एसोसिएसन नेपालले उक्त योजना ल्याउन लागेको हो ।
हरित कर्जा योजनामा गरिने लगानीका लागि विस्तारै स्रोतको सुनिश्चतता पनि गर्दै जाने उद्देश्यले ‘हरित निक्षेप योजना’ पनि ल्याउन लागेको एसोसिएसनले जनाएको छ । ‘हरित निक्षेप योजना’मा अन्य बचत र मुद्दति निक्षेपमा भन्दा ०.२५५ बढी ब्याज व्यवस्था गर्न लागेको छ ।साथै, ‘हरित कर्जा योजना’मा अन्य सोही प्रकृतिको कर्जा योजनामा भन्दा ०.२५५ ले कम ब्याजमा कर्जा प्रवाह गर्नेगरी कर्जा योजनाको प्रडक्ट पेपर विकास गरिने संघले जनाएको छ ।
विकास बैंकहरुले आ–आफ्ना बैंकको व्यावसायिक रणनीतिअनुसार अझ बढी सुविधा दिनेगरी प्रडक्ट पेपर विकास गर्न सक्ने निर्णय पनि एसोसिएसनले गरेको छ । कार्बन उत्सर्जन गर्ने र जलवायु परिवर्तनलाई असर गर्ने कुनै पनि उद्योग व्यवसायले हरित कर्जा सुविधा लिन पाउने छैनन् । आ–आफ्ना बैंकका सञ्चालक समितिबाट प्रडक्ट पेपर स्वीकृत गराई ‘हरित निक्षेप योजना’ र ‘हरित कर्जा योजना’ बजारमा ल्याउन एसोसिएसनले सदस्य बैंकहरुलाई परिपत्र जारी गरिसकेको जनाएको छ । उक्त योजनाको प्राथमिक क्षेत्रहरु कृषिजन्य उद्यम, बनजन्य उद्यम, जल उर्जा,सौंर्य उर्जा, जैविक उर्जा, वायु उर्जा, केवलकार/रोपवे, विद्युतीय सवारी साधन, फोहोर पानी प्रशोधन गर्ने उद्यम रहेका छन् ।
वि.सं.२०८० साउन ३ बुधवार १२:३८ मा प्रकाशित
