काठमाडौं । २०८० जेठ मसान्तमा वाणिज्य बैंकहरुबाट प्रवाह भएको कुल कर्जामध्ये कृषि क्षेत्रमा १३.१ प्रतिशत(रु.५५२ अर्ब ९९ करोड), ऊर्जा क्षेत्रमा ६.८ प्रतिशत (रु.२८६ अर्ब ७७ करोड) र लघु, घरेलु, साना एवम् मझौला उद्यमका क्षेत्रमा ९.९ प्रतिशत (रु.४१८ अर्ब ३६ करोड) लगानीमा रहेको छ । त्यसैगरी, विकास बैंकहरुबाट कृषि, लघु, घरेलु तथा साना उद्यम/व्यवसाय, ऊर्जा र पर्यटन क्षेत्रमा कुल कर्जाको २४.९ प्रतिशत (रु.११३ अर्ब १८ करोड) र वित्त कम्पनीहरुबाट २२.३ प्रतिशत (रु.१९ अर्ब ६५ करोड) लगानीमा रहेको छ ।
वाणिज्य बैंकहरुबाट प्रवाह भएको कुल कर्जा सापटमध्ये २०८० जेठ मसान्तमा औसत ६.१ प्रतिशत (रु.२६० अर्ब ८४ करोड) कर्जा विपन्न वर्गमा गएको छ । त्यसैगरी, विकास बैंकहरुबाट यस क्षेत्रमा ९.१ प्रतिशत (रु.४२ अर्ब ३२ करोड) र वित्त कम्पनीहरुबाट ६.१ प्रतिशत (रु.५ अर्ब ६५ करोड) कर्जा लगानीमा रहेको छ ।
नेपाल सरकारबाट ब्याज अनुदान उपलब्ध गराइएको सहुलियतपूर्ण कर्जामध्ये २०८० जेठ मसान्तमा १ लाख ४७ हजार ५ सय १० ऋणीलाई रु.२०३ अर्ब १० करोड कर्जा लगानीमा रहेको छ । नेपाल राष्ट्र बैंकबाट कृषि लगायतका उत्पादनशील क्षेत्र, लघु उद्यम, निर्यात र कोभिड महामारीबाट प्रभावित क्षेत्रमा प्रवाहित कर्जालाई उपलब्ध गराइएको पुनरकर्जा २०८० जेठ मसान्तमा रु.१ अर्ब ९६ करोड लगानीमा रहेको छ ।
वि.सं.२०८० साउन ७ आइतवार १४:०७ मा प्रकाशित
