काठमाडौं । हाल २ वटा जीवन बीमा कम्पनीले प्रिमियम मूल्यमा आईपीओ बिक्री खुला गरिरहेका छन्।
सिजिटन लाइफ र सन नेपाल लाइफले श्रम स्वीकृति लिएर वैदेशिक रोजगारमा गएकाहरुका लागि प्रिमियम मूल्यमा आईपीओ निष्कासन गरेका हुन्।
सिटिजन लाइफको आईपीओमा आज साउन ११ गते बिहीबार साँझसम्म कुल २३ हजार ८३४ आवेदकले कुल १६ लाख ६४ हजार ५८० कित्ताका लागि आवेदन दिएका छन्। कम्पनीको आईपीओमा ४० करोड ६१ लाख रुपैयाँमाथि संकलन भएको छ।
कम्पनीले वैदेशिक रोजगारमा गएकाहरुका लागि कुल ११ लाख २५ हजार कित्ता आईपीओ बिक्री खुला गरेको हो। इन्स्योरेन्सको शेयरमा वैदेशिक रोजगारीमा रहेका नेपालीहरुले असार ३१ गतेदेखि साउन १४ गतेसम्म आवेदन दिन सक्नेछन्।कम्पनीको आईपीओ निष्काशन तथा बिक्री प्रबन्धकमा एनआइएमबि एस क्यापिटल रहेको छ ।
त्यस्तै, सन नेपाल लाइफको आईपीओमा कुल २२ हजार ३०८ जना आवेदकले १४ लाख २३ हजार १० कित्ताका लागि आवेदन दिएका छन्। सीडीएस एन्ड क्लियरिङका अनुसार बिहीबार साँझसम्म कम्पनीको आइपीओमा ३४ करोड रुपैयाँभन्दा संकलन भएको छ ।
कम्पनीले वैदेशिक रोजगारमा गएकाहरुका लागि कुल ९ लाख ६० हजार कित्ता आईपीओ बिक्री खुला गरेको हो। इन्स्योरेन्सको शेयरमा वैदेशिक रोजगारीमा रहेका नेपालीहरुले साउन १ गतेदेखि १५ गतेसम्म आवेदन दिन सक्नेछन्। यसमा न्युनतम १० कित्ता र अधिकतम २० हजार कित्ताको लागि आवेदन दिन सकिने छ ।
इन्स्योरेन्सको धितोपत्र निष्काशन तथा बिक्री प्रबन्धक नेपाल एसबिआई मर्चेण्ड बैंकिङ्ग लिमिटेड रहेको छ। वैदेशिक रोजगारीमा रहेका नेपालीहरुले नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थाहरु र तिनका शाखा कार्यालयहरु तथा सिडिएस एण्ड क्लियरिङ्ग लिमिटेडबाट उपलब्ध गराएको ‘मेरो शेयर’ सफ्टवेयरबाट आवेदन दिन सक्नेछन्।
वि.सं.२०८० साउन ११ बिहीवार १७:३२ मा प्रकाशित