काठमाडौं। चुक्ता पुँजि नपुर्याउने आधा दर्जन बीमा कम्पनीलाई हकप्रद सम्बन्धी प्रक्रिया अघि बढाउन नेपाल बीमा प्राधिकरणले सहमति दिने निर्णय गरेको छ ।
नेपाल बीमा प्राधिकरणको बुधबार बसेको सञ्चालक समितिको बैठकले ६ वटा बीमा कम्पनीलाई हकप्रद सेयर जारी गर्न अनुमति दिने निर्णय गरेको हो। पहिलो चरणमा मर्ज भएर पनि तोकेको पुँजी नपुगेका ३ वटा जीवन बीमा र ३ वटा निर्जीवन बीमा कम्पनीलाई हकप्रद सेयर जारी गर्ने अनुमति दिने प्राधिकरणले निर्णय गरेको छ।
पधिकरणको सहमतिसँगै पहिलो चरणमा सानिमा रिलायन्स लाइफ, सूर्यज्योति लाइफ, प्रभु महालक्ष्मी लाइफ, युनाइटेड अजोड, सानिमा जीआईसी इन्स्योरेन्स र हिमालयन एभरेष्ट इन्स्योरेन्सलाई हकप्रद सेयर निकाल्न दिने निर्णय गरेको प्राधिकरणले गरेको छ। यी कम्पनीलाई न्यूनतम १० प्रतिशतदेखि २५ प्रतिशतसम्म हकप्रद सेयर निष्कासनको अनुमति दिइने प्राधिकरणले जानकारी दिएको छ ।
‘पुँजी पुर्याउन सानिमा रिलायन्सलाई १९.५० प्रतिशत, सूर्यज्योतिलाई १० प्रतिशत, प्रभु महालक्ष्मी लाइफ इन्स्योरेन्सलाई २१.९५ प्रतिशत, युनाइटेड अजोडलाई २३.२६ प्रतिशत, सानिमा जीआईसी इन्स्योरेन्सलाई २५ प्रतिशत र हिमालयन एभरेष्टलाई ११.६१ प्रतिशत हकप्रद ल्याउनुपर्ने देखिन्छ’, ती अधिकारीले भने, ‘सोहीबमोजिम हकप्रद ल्याउन उनीहरुलाई अनुपाति दिने निर्णय भएको छ।’
प्राधिकरणले जीवन बीमा कम्पनीका लागि ५ अर्ब र निर्जीवन बीमा कम्पनीका लागि २ अर्ब ५० करोड रुपैयाँ न्यूनतम पुँजी तोकेको छ।
वि.सं.२०८० साउन ३२ बिहीवार १०:१३ मा प्रकाशित
