काठमाडौं । सन् २०२५ का लागि अमेरिकी सरकारको डाइभर्सिटी भिसा (डीभी) बुधबार रातिबाट खुल्ने भएको छ ।
नेपाली समय अनुसार आज राति ९ः४५ बजेदेखि डिभी चिठ्ठा समेत भनेर चिनिइने यो कार्यक्रमका लागि आवेदन लिन थालिने नेपालस्थित अमेरिकी दूतावासले जानकारी दिएको छ ।
डिभीको आवेदन आगामी नोभेम्बर ७ तारिख राति १०ः४५ बजेसम्म रहनेछ । दूतावासले एक सूचना जारी गर्दै एकजना व्यक्तिले एकपटक एउटा मात्र आवेदन दिन भनेको छ । एकभन्दा बढी आवेदन एकै व्यक्तिबाट परेको खण्डमा त्यस्ता आवेदन रद्ध हुने समेत जानकारी गराइएको छ ।
दूतावासले आवेदनका लागि कुनै शुल्क नलाग्ने समेत प्रष्ट पारेको छ । डिभी भर्नका लागि एक मात्र आधिकारिक वेबसाइट http://dvprogram.state.gov रहेको छ ।
अहिले दिइएको आवेदनको नतिजा २०२४ मे महिनामा प्रकाशित हुने दूतावासले जनाएको छ ।
वि.सं.२०८० असोज १७ बुधवार १९:४८ मा प्रकाशित
