काठमाडौं । सर्बोत्तम सिमेन्टले बुक बिल्डिङबाट आईपिओ निष्काशन गर्ने अनुमती पाएको छ । नेपाल धितोपत्र बोर्डले सोमबार बुक बिल्डिङबाट आइपिओ निष्कासन गर्ने अनुमती पाएको हो ।
धितोपत्र बोर्डले पहिलो चरणमा योग्य संस्थागत लगानीकर्तालाई सार्वजनिक निष्कासन हुने सेयरको ४० प्रतिशतले हुने २४ लाख कित्ता सेयर बुक बिल्डिङ विधिबाट ल्याउन सर्वोत्तम सिमेन्टलाई स्वीकृति दिएको बोर्डका प्रवक्ता मुक्तिनाथ श्रेष्ठले जानकारी दिए।
कम्पनीले योग्य संस्थागत लगानीकर्ताबाट प्राप्त आशयमूल्य अनुसार आधारमूल्यमा २० प्रतिशत थप गरी हुने माथिल्लो सीमा ७५१.५० रुपैयाँ र तल्लो सीमा ५०१ रुपैयाँ हुनेगरी धितोपत्र बोर्डमा आवेदन दिएको थियो। धितोपत्र बोर्डले कम्पनीको आधारमूल्य ५०१ रुपैयाँ तय गरेको निष्कासनको अनुमति दिएको छ। ‘अब बिक्री मूल्यमा माथिल्लो सीमा आधार मूल्यबाट २० प्रतिशतसम्म माथि जानसक्ने गरी ६०१ रुपैयाँ र तल्लो सीमा आधार मूल्यबाट २० प्रतिशतसम्म कम हुनेगरी ४०१ रुपैयाँभित्र योग्य संस्थागत लगानीकर्तालाई बुक बिल्डिङ विधिबाट आईपीओ निष्कासन गर्नुपर्नेछ’, श्रेष्ठले भने।
आइपिओको बिडिङ अमाउन्ट(बोल कबोल मुल्य) ५०१ रुपैयाँ कायम गरिएको छ । योग्य सस्थागत लगानीकर्ताहरुले खरिद गरेको न्युनतम मुल्यमा १० प्रतिशत घटाएर सर्वसाधारणलाई आइपिओ निष्कासन गरिनेछ ।
वि.सं.२०८० असोज ३० मंगलवार १९:४१ मा प्रकाशित
