काठमाडौं । मिर्मिरे लघुवित्त वित्तीय संस्थाको एफपीओ बाँडफाँड मिति तय गरेको छ । बिक्री प्रबन्धक एसबीआई मर्चेन्ट बैंकिङका अनुसार कार्तिक १६ गते बिहीबार बिहान ८.३० बजे एफपीओ बाँडफाँड गर्ने तयारी गरिएको छ ।
मिर्मिरे लघुवित्तको एफपीओमा १४ लाख २१ हजार ७७७ जनाले १ करोड ६१ लाख ७४ हजार ५८० कित्ताका लागि आवेदन दिएका छन् । यो १३०.६३ गुणा बढी आवेदन हो ।
मागभन्दा बढी आवेदन परेका कारण यो एफपीओ गोलाप्रथा विधिबाट बाँडफाँड हुनेछ । जसअनुसार कम्पनीको एफपिओ १२ हजार ३८१ जनाले १०/१० कित्ता र सोहि मध्यका ६ जनाले थप १/१ कित्ता गरि ११ कित्ता पाउनेछन् । त्यस्तै, १४ लाख ९ हजार ३९५ भन्दा धेरै आवेदकहरूले एफपीओ नपाउने भएका छन् ।
लघुवित्तले १ करोड २३ लाख ८१ हजार ६४५ रुपैयाँ बराबरको प्रतिकित्ता १०० रुपैयाँ अंकित मूल्यका १ लाख २३ हजार ८१६.४५ कित्ता शेयर निष्काशन गरेको हो।
लघुवित्तको धितोपत्र निष्काशन तथा बिक्री प्रबन्धक नेपाल एसबिआई मर्चेण्ट बैंकिङ्ग लिमिटेड रहेको छ।
वि.सं.२०८० कात्तिक १३ सोमवार १६:०४ मा प्रकाशित
