काठमाडौं । मंसिर महिनाको लागि अधिकांश राष्ट्रियस्तरका विकास बैंकहरुले ब्याजदर घटाएका छन् । विकास बैंकहरुले सार्वजनिक गरेका ब्याजदर अनुसार दुई बैंक बाहेक सबै राष्ट्रियस्तरका विकास बैंकहरुको व्यक्तिगत मुद्दति निक्षेपको ब्याजदर कात्तिकको तुलनामा घटेको छ ।
जसअनुसार पाँच ओटा विकास बैंकहरुले मंसिर महिनाका लागि मुद्दति निक्षेपमा ९.४० प्रतिशत ब्याजदर दिने घोषणा गरेका छन् । ती बैंकको मुद्दति निक्षेपमा औसत ब्याजदर ९.७४ प्रतिशत रहेको छ ।
कार्तिक महिनामा भने औसत ब्याजदर १०.२५ प्रतिशत थियो । लुम्बिनी विकास बैंक र सांग्रिला डेभलपमेन्ट बैंकले भने कात्तिक महिनाको तुलनामा मंसिरमा मुद्दति निक्षेपको ब्याजदर ०.३५ प्रतिशतले बढाएर १०.६० प्रतिशत पुर्याएका छन् । त्यसैगरी, मंसिर महिनाका लागि गरिमा विकास बैंकले ०.३५ प्रतिशत ब्याजदर घटाएर ९.७५ प्रतिशत कायम गरेको छ ।
साइन रेसुंगा विकास बैंकको पनि मुद्दती निक्षेपमा ९.४० प्रतिशत ब्याजदर कायम छ ।उक्त बैंकको अघिल्लो महिना भने ब्याजदर १०.२५ प्रतिशत थियो । त्यसैगरी, ज्योति विकास बैंकले पनि मुद्दती निक्षेपमा ९.४० प्रतिशत ब्याजदर कायम गरेको छ ।उक्त कम्पनीको अघिल्लो महिना पनि ब्याजदर १०.२५ प्रतिशत नै थियो ।
अन्य पाँच ओटा बैंकको ब्याजदर ०.८५५ ले घटेर ९.४० प्रतिशत कायम भएको छ । बैंकहरुले निक्षेपको ब्याजदर परिर्वतन गर्दा औसत १० प्रतिशत विन्दुले घटाउन वा बढाउन सक्ने व्यवस्था छ ।
अघिल्लो महिना भने सबै विकास बैंकले मुद्दति निक्षेपमा १०.२५ प्रतिशत ब्याजदर कायम गरेका थिए।
वि.सं.२०८० कात्तिक ३० बिहीवार १९:०८ मा प्रकाशित