काठमाडौं । नेप्सेमा सूचीकृत ३ कम्पनीको वार्षिक साधारण सभा आज मंसिर १५ गते शुक्रबार बस्दै छ । आज साधारण सभा बस्नेमा इमर्जिङ नेपाल, आरएसडीसी लघुवित्त, र माण्डु हाइड्रोपावर रहेका छन् । यी ३ वटै कम्पनीले लगानीकर्तालाई गत वर्षको नाफाबाट लाभांश प्रस्ताव गरेका छन् ।
इमर्जिङ नेपाल
इमर्जिङ नेपाल लिमिटेडको वार्षिक साधारण सभा बानेश्वर ब्यांकेट थापागाँउ, नयाँ बानेश्वर, काठमाडौंमा बिहान ११ बजेदेखि सुरु हुनेछ । उक्त सभामा यस कम्पनीले सेयरधनीलाई गत आर्थिक वर्षको नाफाबाट ८.४२ प्रतिशत नगद लाभांश (कर सहित) वितरण प्रस्ताव पेश गर्नेछ । साधारण सभा प्रयोजनार्थ कम्पनीले मंसिर ६ गते बुक क्लोज गरिसकेको छ । यसर्थ, मंसिर ५ गतेसम्म कायम सेयरधनीले मात्र प्रस्तावित लाभांश प्राप्त गर्न र सभामा भाग लिन सक्ने छन् ।
आरएसडीसी लघुवित्त
आरएसडीसी लघुवित्तको साधारण सभा वेष्टर्न एसियन होटल प्रालि बुटवल, कालिकास्थानमा बिहान ९ बजेदेखि सुरु हुनेछ । सभामा आरएसडीसीले सेयरधनीलाई गत आर्थिक वर्षको नाफाबाट ८.६० प्रतिशत बोनस र कर प्रयोजनका लागि ०.४५ प्रतिशत नगद लाभांश वितरण गर्ने प्रस्ताव पेश गर्नेछ । साधारण सभा प्रयोजनका लागि यस लघुवित्तले मंसिर ७ गते बुक क्लोज गरिसकेको छ । यसर्थ, मंसिर ६ गतेसम्म कायम सेयरधनीले प्रस्तावित लाभांश र सभामा भाग लिन पाउने छन् ।
माण्डु हाइड्रोपावर
माण्डु हाइड्रोपावरको वार्षिक साधारण सभा कोर्टयार्ड छाया सेन्टर, ठमेल काठमाडौंमा बिहान १० बजे सुरु हुनेछ । हाइड्रोपावरले सभामा गत आर्थिक वर्षको नाफाबाट १० प्रतिशत नगद लाभांश वितरण गर्ने प्रस्ताव पेश गर्नेछ । साधारण सभा र लाभांश वितरण प्रयोजनका लागि कम्पनीले मंसिर ४ गते बुक क्लोज गरिसकेको छ । यसमा कात्तिक २३ गतेसम्म कायम सेयरधनीले मात्र लाभांश पाउन सक्ने देखिएको छ ।
वि.सं.२०८० मंसिर १५ शुक्रवार ०७:११ मा प्रकाशित
