काठमाडौं। नेपाल धितोपत्र बोर्डले सेयरको लक इन पिरियड समयमा नै प्रकाशित गर्न र यसको नियमन गर्न सरोकारवाला निकायलाई निर्देशन दिएको छ।
धितोपत्र बोर्ड सञ्चालक समिति बैठकले ‘लकइन’मा रहेको सेयर दोस्रो बजारमा कारोबार खुल्नुभन्दा ३० दिनअघि नै लगानीकर्ता र सरोकारवालाई सूचना जारी गरेर जानकारी गराउनुपर्ने निर्णय गरेको हो ।
धितोपत्र बोर्डले सम्पूर्ण सूचीकृत संगठित संस्थालाई सेयरको लक इन अवधि समाप्त हुनुभन्दा कम्तीमा ३० दिन अगाडि लगानीकर्ता एवं सम्बन्धित सबै सरोकारवालालाई जानकारी गराउन भनेको छ ।
सार्वजनिक रुपमा जारी भएको सूचना धितोपत्र बोर्ड, नेप्से र सीडीएसलाई पनि उपलब्ध गराउनु पर्ने निर्देशनमा उल्लेख छ । उक्त सूचना नेप्से, सीडीएस र लक इन अवधि सकिएको जानकारी गराउने कम्पनीले लक इन अवधि सकिएपछि एक सातासम्म वेवसाइटमा राख्नु पर्नेछ ।
वि.सं.२०८० मंसिर २५ सोमवार १४:३७ मा प्रकाशित
