काठमाडौं । अपर तामाकोशी हाइड्रोपावरको हकप्रद सेयर आगामी मंसिर २८ गते बाँडफाँड हुने भएको छ ।
सेयरधनीहरुले अनलाइनभन्दा बढी भौतिकरुपमा आवेदन दिएकाले फारम संकलन गर्न बढी समय लागेको बिक्री प्रबन्धकले बताएको छ ।
यसअघि लगानीकर्ताहरुले कम्पनीको हकप्रद सेयरका लागि आवेदन लिएका समय करिब दुई महिना बितिसक्दा पनि बाँडफाँट नगरेर रकम बन्धक बनाएको गुनासो गर्दै आएका थिए ।
कम्पनीले गत भदौ १८ गतेदेखि आफ्ना सेयरधनीहरुका लागि चुक्तापूँजीको १ः१ अनुपातमा १०० प्रतिशत हकप्रद सेयर बिक्री खुला गरेको थियो।
यसमा असोज ७ गतेसम्म आवेदन दिने म्याद थियो। मागबमोजिम आवेदन नपरेपछि हकप्रदमा असोज २२ गते बैंकिङ समयसम्म आवेदन दिन पाइने व्यवस्था गरिएको थियो ।
१०० रुपैयाँ अंकित मूल्यमा कम्पनीले १० अर्ब ५९ करोड रुपैयाँ बराबरको १० करोड ५९ लाख कित्ता हकप्रद बिक्री खुला गरेको थियो ।
कम्पनीमा ५१ प्रतिशत सरकार र ४९ प्रतिशत सर्वसाधारणको सेयर स्वामित्व छ। हाल कम्पनीको चुक्तापूँजी १० अर्ब ५९ करोड रुपैयाँ रहेको छ । हकप्रद सेयरपछि कम्पनीको चुक्तापूँजी २१ अर्ब १८ करोड रुपैयाँ पुग्नेछ।
वि.सं.२०८० मंसिर २६ मंगलवार १७:०५ मा प्रकाशित