काठमाडौं । नेपाल स्टक एक्सचेन्ज (नेप्से) मा बिहीबार भिजन लुम्बिनी उर्जा, चिरख्वा हाइड्रोपावर लिमिटेड र नेपाल वेयर हाउजिङको सेयर कारोबार सुरु भएको छ । तीन वटै कम्पनीको आईपीओ बुधबार नेपसेमा सूचिकृत भएको हो ।
बिहीबार स्पेसल प्रि ओपनिङ सेसनमा भिजन लुम्बिनीको पहिलो कारोबार प्रतिकित्ता ३६५. ३० रुपैयाँमा खुला भएको हो । सोही भाउलाई आधार मानेर यसको नियमित कारोबार हुनेछ । नेप्सेले यसको पहिलो कारोबारका लागि प्रतिकित्ता १२१.७८ रुपैयाँदेखि ३६५.३४ रुपैयाँसम्म ओपनिङ रेन्ज तोकेको थियो ।
चिरख्वा हाइड्रोपावरको पहिलो कारोबार प्रतिकित्ता ३०० रुपैयाँमा खुला भएको छ । यसको पहिलो कारोबारका लागि नेप्सेले प्रतिकित्ता १००.०१ रुपैयाँदेखि ३००.०३ रुपैयाँ ओपनिङ रेन्ज तोकेको थियो ।
यसैगरी, नेपाल वेयर हाउजिङ कम्पनीको बिहीबार स्पेसल प्रि ओपनिङ सेसनमा प्रतिकित्ता २०८.८० रुपैयाँमा कारोबार खुला भएको छ । यसको कारोबारका लागि नेप्सेले प्रतिकित्ता ९३.०४ रुपैयाँदेखि २७९.१२ रुपैयाँ ओपनिङ रेन्ज तोकेको थियो
वि.सं.२०८० पुस ५ बिहीवार ११:०३ मा प्रकाशित