काठमाडौं । एनआईसी एशिया लघुवित्त वित्तीय संस्था लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ। प्रकाशित विवरण अनुसार चालु आर्थिक वर्षको पुस मसान्तसम्ममा लघुवित्तले ११ लाख ६ हजार रुपैयाँ मात्र खुद नाफा कमाएको छ। यो गत आर्थिक वर्षको सोही अवधिको तुलनामा ९९.२६ प्रतिशत कम हो। गत आर्थिक वर्षको सोही अवधिसम्ममा लघुवित्तले १ करोड ४९ लाख रुपैयाँ खुद नाफा कमाएको थियो।
लघुवित्तको आम्दानी घटेको र खराब कर्जा उल्लेख्य बढेका कारण खुद नाफा घट्न पुगेको हो।
समीक्षा अवधिमा लघुवित्तको खुद ब्याज आम्दानी २७.०८ प्रतिशत घटेको छ भने खुद फि तथा कमिशन आम्दानी ५६ लाख रुपैयाँ ऋणात्मक रहेको छ। त्यसैगरी, लघुवित्तको कुल सञ्चालन आम्दानी २९.६६ प्रतिशत र सञ्चालन मुनाफा ८९.६२ प्रतिशत घटेको छ। लघुवित्तको खराब कर्जा ३.३८ प्रतिशतबाट बढेर १३.७६ प्रतिशत पुगेसँगै इम्पेरमेन्ट चार्ज बढेर ५ करोड ६४ लाख रुपैयाँ पुगेको छ।
नाफासँगै लघुवित्तको प्रतिशेयर आम्दानी १७ रुपैयाँ ८ पैसा घटेर १३ पैसामा झरेको छ। पुस मसान्तसम्ममा लघुवित्तको वितरणयोग्य मुनाफा २६ करोड ३५ लाख रुपैयाँ रहेको छ भने वितरणयोग्य प्रतिशेयर आम्दानी १५ रुपैयाँ १५ पैसा रहेको छ।
हाल कम्पनीको चुक्तापुँजी १ अर्ब ७३ करोड रुपैयाँ रहेको छ । लघुवित्तको जगेडा कोषमा १ अर्ब ६ करोड रुपैयाँ सञ्चित छ। यस अवधिमा लघुवित्तले १६ अर्ब ४२ करोड रुपैयाँ निक्षेप तथा सापटीबाट १६ अर्ब ५५ करोड रुपैयाँ कर्जा प्रवाह गरेको छ।
वि.सं.२०८० माघ २८ आइतवार ०६:३८ मा प्रकाशित
