काठमाडौं । आज फागुन ६ गते आइतबार हिमालयन रिइन्स्योरेन्स र एसियन लाइफ इन्स्योरेन्सको लाभांश सुरक्षित गर्ने अन्तिम दिन रहेको छ । हिमालयन रिइन्स्योरेन्सले साधारण सभा प्रयोजनको लागि भोली फागुन ७ गते सोमबार बुक क्लोज गर्दैछ ।
एसियन लाइफ इन्स्योरेन्सले सभा प्रयोजनका लागि फागुन ८ गते बुक क्लोज गर्दैछ । भोली फागुन ७ गते प्रजातन्त्र दिवस पर्ने भएकोले सो दिन सेयर बजार बन्द हुनेछ । यसर्थ यी दुई कम्पनीको लाभांश हात पार्न आजै सेयरधनी बन्नुपर्छ ।
हिमालयन रिइन्स्योरेन्सले आर्थिक वर्ष २०७९/८० को नाफाबाट सेयरधनीलाई ४ प्रतिशत बोनस सेयर र कर प्रयोजनका लागि ०.२१ प्रतिशत नगद गरी कुल ४.२१ प्रतिशत लाभांश वितरण गर्दैछ । उक्त लाभांश पारित गर्न फागुन २० गते वार्षिक साधारण सभा बोलाएको छ । सभा, राष्ट्रिय सभा गृह प्रदर्शनीमार्ग काठमाडौंमा बिहान ११ बजे सुरु हुनेछ ।
त्यसैगरी, एसियन लाइफले आर्थिक वर्ष २०७९/८० को नाफाबाट ७.७५ प्रतिशत बोनस सेयर र कर प्रयोजनका लागि ०.४०७ प्रतिशत नगद गरी जम्मा ८.१६ प्रतिशत लाभांश वितरण गर्ने भएको छ । उक्त लाभांश प्रस्ताव पारित गर्न फागुन १८ गते वार्षिक साधारण सभा बोलाएको छ । सभा होटल क्लासिक सिमरा, बारामा बिहान ११ः३० बजे सुरु हुनेछ ।
वि.सं.२०८० फागुन ६ आइतवार ०७:१३ मा प्रकाशित
