काठमाडौं । बुद्ध एयर वरिष्ठ पाइलट एजी शेर्पालाई केही दिनको लागि जहाज उडाउन प्रतिबन्ध लगाइएको छ ।
एयरलाईन्सका सञ्चार प्रमुख दिपेन्द्र कर्णका अनुसार नागरिक उडड्यन प्रधिकरण (क्यान) र एयरले आन्तरिक अनुसन्धान सुरु गरेको र त्यसको लागि भन्दै केही दिनको लागि जहाज उडाउन प्रतिबन्ध लगाएको छ । अनुसन्धान अन्तिम चरणमा पुगेको र प्रतिवेदन आएपछि बाँकी निर्णय हुने उहाँले बताउनुभयो । छानविन पछि त्यो रिपोर्ट क्यानलाई बुझाउने उहाँको भनाई छ । छानविन समितिमा क्यानको तीन जना र एयरलाईन्सको तर्फबाट एक जनाको सहभागीता रहेको छ ।
सोमबार ल्याण्डिङ गियरमा समस्या आएपछि विराटनगरमा अवतरण हुन नसकेको एयरको जहाज त्रिभुवन अन्तर्राष्ट्रिय विमानस्थलमा नै फर्किएको थियो । काठमाडौंका आकाशमा २ घन्टा घुमेर उक्त जहाजमा विमानस्थलमा सुरक्षित अवतरण भएको थियो ।
जहाजमा यात्रु तथा चालक दलका सदस्यसहित ७१ जना रहेका थिए । काठमाडौंबाट विराटनगरका लागि उडेको विमान अवतरणका क्रममा ल्याण्डिङ गियरमा समस्या भएपछि अवतरण हुन सकेको थिएन ।
सामान्यतया यस्ता खाले घटना भएपछि पाइलट पनि शारिरीक तथा मानसिक रुपमा थकानमा हुने भएकोले कुलिङ अवधि स्वरुप केही दिनको लागि जहाज चलाउन रोक लगाउने र पूर्ण तया स्वस्थ्य बनेपछि जहाज चलाउने प्रचलन रहन्छ ।
वि.सं.२०७८ असोज १४ बिहीवार १२:२३ मा प्रकाशित
