काठमाडौं । उद्योग वाणिज्य महासंघ अन्तर्गतको कृषि उद्यम केन्द्र (एईसी) ले अघि सारेको ‘सय किसान’ अवधारणा सफल बनाउन आराभा नेपाल मोर्डन एग्रिकल्चरबीच सम्झौता भएको छ ।
सम्झौतामा एईसीका सभापति अरुणराज सुमार्गी र आराभा नेपाल मोर्डन एग्रिकल्चरका अध्यक्ष कृष्णप्रसाद बजगाईँले हस्ताक्षर गर्नुभएको छ । एईसीका सभापति सुमार्गीले मुलुकको कृषी क्षेत्रका लागि ‘गेमचेन्जर’ अवधारणाका रुपमा ‘सय किसान’ कार्यक्रम घोषणा गर्नुभएको थियो ।
उक्त अवधारणालाई ‘कार्यान्वयनमा लैजान एईसी र आराभा नेपालबीच सम्झौता भएको बताइएको छ । सम्झौता अनुसार एईसी र आराभा नेपाल मिलेर अबर मुलुकभरबाट सय जना किसान छनोट गर्नेछन् ।
देशभरका किसानको अवस्था, उनीहरुको व्यवसायिक स्थिती र व्यवसायिक अवस्थालाई सुधार गर्न गर्नुपर्ने पहल समेटेर आधारपत्र तयार पारिने सभापति सुमार्गीले बताउनुभयो । उहाँका अनुसार आधारपत्र तयार भएपछि एक जिल्लाबाट एक किसान नछुट्ने गरी सय जना किसान छनोट गरिनेछ ।
आराभा नेपाल इजरायलबाट फर्किएका नेपालीहरुले सञ्चालन गरेको कम्पनी हो । यसले विगत ५ वर्षदेखि नेपालको कृषी शिक्षा र कृषी पर्यटनका क्षेत्रमा काम गर्दै आएको छ ।
वि.सं.२०७८ असोज १५ शुक्रवार १५:५१ मा प्रकाशित
