काठमाडौं । सिभिल बैंकले चालु आर्थिक वर्ष २०७८÷७९ को प्रथम त्रैमासिक वित्तीय विवरण सार्वजनिक गरेको छ ।
बैंकले सार्वजनिक गरेको वित्तीय विवरणअनुसार असोज मसान्तसम्म २९ करोड१८ लाख ४९ हजार रुपैयाँ नाफा कमाएको छ ।
जुन गत वर्षको सोही अवधिमा २०१.८७ प्रतिशतले बढी हो । गत वर्षको उक्त अवधिमा बैंकले ९ करोड ६६ लाख ७८ हजार रुपैयाँ नाफा कमाएको थियो ।
उक्त अवधिमा बैंकले ९० करोड ६९ लाख ४ हजार रुपैयाँ खुद ब्याज आम्दानी गरेको छ । यो आम्दानी गत वर्षको असोज मसान्तको तुलनामा ८०.५२ प्रतिशतले बढी हो ।
गत वर्षको सोही अवधिमा बैंकले ५० करोड २३ लाख ५८ हजार रुपैयाँ खुद ब्याज आम्दानी गरेको थियो ।
बैंकको चुक्ता पुँजी ८ अर्ब ६४ करोड ३६ लाख ६१ हजार रुपैयाँ रहेको छ । बैंकले जगेडा तथा कोषमा १ अर्ब ५२ करोड २० लाख १४ हजार रुपैयाँ राखेको छ ।
बैंकको वितरणयोग्य नाफा ६० करोड २८ लाख ४६ हजार रुपैयाँ रहेको छ । बैंकले खराब कर्जा पनि घटाएको छ ।
गत वर्षको असोज मसान्तमा १.५० प्रतिशत रहेको खराब कर्जा यस वर्षको सोही अवधिमा आईपुग्दा घटेर ०.९९ प्रतिशत कायम भएको छ ।
बैंकको प्रतिसेयर आम्दानी १३.५१ रुपैयाँ र प्रतिसेयर नेटवर्थ १२६.८८ रुपैयाँ रहेको छ ।
वि.सं.२०७८ कात्तिक १५ सोमवार १३:०८ मा प्रकाशित
