काठमाडौं । सानिमा बैंकका प्रमुख कार्यकारी अधिकृत (सीईओ) भुवन दाहालले करिब दुई करोड रुपैयाँ तलब, भत्ता बुझ्नुभएको छ ।
सिइओ दाहालले आर्थिक वर्ष २०७७/७८ को पारिश्रमिक , भत्ता तथा सुविधा अन्तर्गत १ करोड ८४ लाख १५ हजार रुपैयाँ बुझ्नु भएको हो ।
बैंकले सार्वजनिक गरेको आर्थिक वर्ष २०७७/७८ को वार्षिक प्रतिवेदनले यस्तो देखाएको हो । प्रतिवेदन अनुसार गत आवमा बैंकका अन्य सिईओ बाहेक अन्य प्रमुख व्यवस्थापकहरुले ३ करोड ८६ लाख ९२ रुपैयाँको पारिश्रमिक, भत्ता तथा सुविधा बुझेका छन् ।
बैंकले संचालक समितिका अध्यक्षलाई प्रति बैठक भत्ता १३ हजार र संचालकलाई प्रति बैठक भत्ता १२ हजार रुपैयाँ उपलब्ध गराएको छ ।
सो बाहेक अध्यक्ष तथा संचालकहरुलाई पत्र–पत्रिका, टेलिफोन, इन्टरनेट आदि सेवाका निमित्त प्रति सदस्य मासिक १२ हजार रुपैयाँ उपलब्ध गराउने गरिएको प्रतिवेदनमा उल्लेख छ । यस बाहेक अन्य कुनै सुविधा प्रदान नगरिएको बैंकले जनाएको छ ।
बैंकले गत आर्थिक वर्षमा व्यवस्थापनमा २ अर्ब २५ करोड ८३ लाख ११ हजार ६ सय ९५ रुपैयाँ खर्च गरेको छ ।
जसमध्ये, कर्मचारी तलव भत्ता तथा अन्य सुविधा बापत बैंकले गत वर्ष १ अर्ब ४३ करोड ९१ लाख ९६ हजार ७ सय ९३ रुपैयाँ खर्च गरेको प्रतिवेदनमा उल्लेख छ ।
संचालक समितिका सदस्यहरुलाई आव २०७७/७८ मा भत्ता बापत जम्मा ३६ लाख ४३ हजार रुपैयाँ भुक्तानी गरिएको छ ।
भत्ता तथा सुविधाहरूमा प्रचलित कानून अनुसार करकट्टी गरेर मात्र भुक्तानी गर्ने गरिएको बैंकले जनाएको छ ।
वि.सं.२०७८ कात्तिक १५ सोमवार १७:४४ मा प्रकाशित