झापा । पछिल्लो समय जिल्लामा अष्ट्रिच पालनतर्फ किसानको आकर्षण बढ्दै गएको छ । यहाँ पछिल्लो समय तीनवटा अष्ट्रिच फर्म खुलेका छन् ।
ती तीनवटा फर्ममध्ये धरमपुर– ७ चर्चाबारीको अष्ट्रिच फर्म जिल्लाकै ठूलो फर्म हो । स्थानीय कृष्णप्रसाद रिजालले फर्म खोलेर व्यवसाय सुरु गरेका हुन् । उनले रु एक करोडको लागतमा बुटवलबाट अष्ट्रिचका ५० वटा चल्ला ल्याएर फर्म खोलेका हुन् ।
चार बिगाहा दुई कठ्ठा जग्गामा पाथीभरा अष्ट्रिच कृषि फर्म खोलेर अहिले ५० वटा अष्ट्रिच पालिएको छ । “नयाँ व्यवसाय गर्न मन लाग्यो, अष्ट्रिच पालनमा हात हाले,” उनले भने । जिल्लाको झिलझिलेमा पेट्रोलपम्प सञ्चालन गर्दे आउनुनभएका रिजालले कृषिमा केही गर्ने सोचका साथ सो फर्मको स्थापना गरेका हुन् ।
“अष्ट्रिचको मासु कसरी खपत गर्ने भन्ने चिन्ता छ,” उनले भने । अष्ट्रिच पाल्न बुटवलबाटै घाँस ल्याएको उनी बताउछन् । फर्म सञ्चालक दीपेश रिजालले अष्ट्रिच पालन अन्य कृषि पेसा भन्दा छुट्टै व्यवसाय भएकाले यसको व्यावसायिक विकासमा राज्यले सहयोग पु¥याउनुपर्ने बताउछन् ।
“केही गर्छु भन्ने उत्साहित युवालाई सरकारले सहुलियतमा ऋण उपलव्ध गराउनुपर्छ,” उनले भने । अहिले दुईजना कर्मचारी कार्यरत छन् । अष्ट्रिचलाई खुवाउने दाना र घाँस बनाउने सबै मेसिन फर्ममै छन् ।
१२ असार २०७३, १२।३०
वि.सं.२०७३ असार १२ आइतवार १३:२७ मा प्रकाशित
