काठमाडौँ । महालक्ष्मी विकास बैंकले लाभांश पारित गर्ने मुख्य एजेण्डा सहित वार्षिक साधारण सभा आह्वान गरेको छ । पुस २ गते बसेको बैंकको संचालक समितिको ५०६ औं बैठकले पुस २५ गते बीसौं वार्षिक साधारणसभा आह्वान गरेको हो ।
बैंकले साधारण सभा काठमाण्डौको भद्रकालीस्थित आर्मी अफिसर्स क्लबमा आह्वान गरेको छ ।
वार्षिक साधारणसभामा संचालक समितिले प्रस्ताव गरेबमोजिम आर्थिक वर्ष २०७७–७८ को सञ्चित मुनाफा रकमबाट सेयरधनीहरुलाई हाल कायम चुक्तापूँजीको २० प्रतिशतका दरले बोनस सेयर र प्रयोजनका लागि १.०५२६ प्रतिशतको दरले नगद लाभांश वितरणको प्रस्ताव पनि पेश हुनेछ । यो प्रस्ताव पारित भएपछि बैंकको चुक्तापूँजी बढेर ४ अर्ब रुपैयाँ माथि पुग्नेछ ।
संचालक समितिको वार्षिक प्रतिवेदन पारित गर्ने, लेखापरीक्षकको प्रतिवेदनसहित २०७८ साल असार मसान्तको बासलात तथा आर्थिक वर्ष २०७७/७८ को नाफा नोक्सान हिसाब तथा सोही अवधिको नगद प्रवाह विवरण लगायतका वार्षिक आर्थिक विवरणसँग सम्बद्ध वित्तीय विवरणसहितका अनुसूचिहरु पारित गर्ने प्रस्तावहरु पनि राखिएका छन् ।
साधारणसभामा संचालक समितिको बैठक भत्ता, दैनिक तथा भ्रमण भत्ता लगायतका अन्य सुविधा वृद्धि गर्ने प्रस्ताव समेत पेश हुने बताइएको छ ।
यस्तै, संस्थापक समूह(क)बाट ३ जना र सर्वसाधारण समूह(ख)बाट ३ जना गरी जम्मा ६ जना संचालकको निर्वाचन समेत हुने बैंकले जारी गरेको सूचनामा उल्लेख छ ।
स्वतन्त्र संचालक भने यसअघि नै नियुक्त भइसकेको बैंकले जनाएको छ ।
बैंकले अन्य बेलाजस्तो अन्य कुनै बैंक तथा वित्तीय संस्थासँग मर्जरमा जाने सम्बन्धमा कुनै पनि प्रस्ताव राखेको छैन । बैंकले यसअघि नै कसैसँग मर्जरमा नजाने, बरु आफैं बलियो बन्दै अगाडि बढ्ने घोषणा गरिसकेको छ ।
वि.सं.२०७८ पुस ४ आइतवार १२:१६ मा प्रकाशित
