काठमाडौं । तीन लघुवित्त वित्तीय संस्थाले २० करोड ९६ लाख ४५ हजार रुपैयाँ बढीको एफपीओ निष्काशन गर्ने भएका छन् ।
किसान लघुवित्त वित्तीय संस्था, नयाँ सारथी लघुवित्त र मिर्मिरे लघुवित्त वित्तीय संस्थाले कुल १६ लाख ७९ हजार २२४ कित्ता एफपीओ निष्काशन गर्ने भएका हुन् ।
यी तीन वटै कम्पनीहरुले प्रतिकित्ता छुट्टाछुट्टै दरमा एफपीओ निष्काशनका लागि नियामक निकाय नेपाल धितोपत्र बोर्डमा निवेदन दिएका छन् ।
कुनको वित्तीय वित्तीय अवस्था कस्तो ?
साना किसान लघुवित्त :
साना किसान लघुवित्त वित्तीय कम्पनीले चालु आर्थिक वर्ष २०७८/७९ को पहिलो त्रैमासमा १६ करोड ५४ लाख ७ हजार रुपैयाँ नाफा कमाएको छ ।
जुन गत वर्षको सोही अवधिको तुलनामा १८.१२ प्रतिशतले बढी हो । गत वर्षको असोज मसान्तमा कम्पनीले १४ करोड ३० हजार रुपैयाँ नाफा गरेको थियो ।
चालु आवको पहिलो त्रैमासमा कम्पनीले २९ करोड ९२ लाख १४ हजार रुपैयाा खुद ब्याज आम्दानी गरेको छ । गत वर्षको सोही अवधिका तुलनामा कम्पनीको खुद ब्याज आम्दानी प्रतिशतले ११.८९ बढी हो । गत वर्षको उक्त अवधिमा कम्पनीले २६ करोड ७४ लाख ६ हजार रुपैयाँ ब्याज आम्दानी गरेको थियो ।
कम्पनीको चुक्ता पुँजी १ अर्ब २५ करोड १५ लाख ३० हजार रुपैयाँ रहेको छ । कम्पनीले जगेडा तथा कोषमा भने २ अर्ब ४९ करोड ५७ लाख ४० हजार रुपैयाँ राखेको छ ।
उक्त अवधिमा कम्पनीले खराब कर्जा पनि घटाएको देखिएको छ । गत वर्षको पहिलो त्रैमासमा ०.९९ प्रतिशत रहेको खराब कर्जा यस वर्षको सोही अवधिमा आईपुग्दा घटाएर ०.६६ प्रतिशत कायम भएको छ । कम्पनीको प्रतिसेयर आम्दानी ५२ रुपैयाँ ८८ पैसा र प्रतिसेयर नेटवर्थ २९९ रुपैयाँ ४२ पैसा रहेको छ ।
कम्पनीले १६ करोड २२ लाख ८२ हजार ४३६ रुपैयाँ बरारबको एफपीओ निष्काशन गर्ने भएको छ । कम्पनीले १२ लाख ८९ हजार २५९ कित्ता एफपीओ निष्काशनको अनुमति माग्दै नेपाल धितोपत्र बोर्डमा निवेदन दिएको छ ।
कम्पनीले असार २९ गते आवेदन दिएको हो । कम्पनीको एफपीओ निष्काशन तथा बिक्री प्रबन्धकमा मुक्तिनाथ क्यापिटललाई नियुक्त गरेको छ ।
नयाँ सारथी लघुवित्त :
एफपीओ निष्काशनको तयारीमा रहेको नयाँ सारथी लघुवित्त वित्तीय संस्थाले चालु आवको पहिलो त्रैमासमा ६५ लाख ५० हजार रुपैयाँ नाफा कमाएको छ ।
कम्पनीको यो नाफा गत वर्षको असोज मसान्तको तुलनामा भने २.९३ प्रतिशत कमी हो । कम्पनीको गत वर्षको पहिलो त्रैमासमा ६७ लाख ४८ हजार रुपैयाँ नाफा गरेको थियो ।
गत वर्षको असोज मसान्तमा ४ करोड ७० लाख ७५ हजार रुपैयाँ खुद ब्याज आम्दानी गरेको कम्पनीले यस वर्षको सोही अवधिमा भने बढाएर ५ करोड १५ लाख २७ हजार रुपैयाँ आम्दानी गरेको छ ।
कम्पनीको चुक्ता पुँजी २५ करोड ४९ लाख ५४ हजार रुपैयाँ रहेको छ । जगेडा तथा कोषमा भने २३ करोड ७७ लाख ८५ हजार रुपैयाँ राखेको छ । कम्पनीको प्रतिसेयर आम्दानी १० रुपैयाँ २८ पैसा र प्रतिसेयर नेटवर्थ १९३ रुपैयाँ २७ पैसा रहेको छ ।
कम्पनीको ११६ रुपैयाँको दरले ३ करोड ८२ लाख रुपैयाँ बरारबको एफपीओ निष्काशन गर्ने भएको छ । कम्पनीले ३ लाख २९ हजार ६४९ कित्ता एफपीओ निष्काशनका लागि गत भदौ ९ गते बोर्डमा निवेदन दिएको छ । बिक्री प्रबन्धकमा भने एनएबि क्यापिटल रहेको छ ।
मिर्मिरे लघुवित्त :
मिर्मिरे लघुवित्त वित्तीय संस्थाले चालु आर्थिक वर्षको प्रथम त्रैमासमा ६ करोड ३७ लाख ६१ हजार रुपैयाँ नाफा कमाएको छ ।
जुन गत वर्षको सोही अवधिको तुलनामा १९३.३२ प्रतिशतले बढी हो । गत वर्षको असोज मसान्तसम्म कम्पनीले २ करोड १७ लाख ३७ हजार रुपैयाँ नाफा कमाएको थियो ।
उक्त अवधिमा कम्पनीको खुद ब्याज आम्दानी १३ करोड ३३ लाख ५८ हजार रुपैयाँ रहेको छ । कम्पनीको खुद ब्याज आम्दानी ११५.७१ प्रतिशतले वृद्धि भएको हो । गत वर्षको सोही अवधिमा कम्पनी ६ करोड १८ लाख २२ हजार रुपैयाँ खुद ब्याज आम्दानी गरेको थियो ।
कम्पनीको चुक्ता पुँजी ४३ करोड ५० लाख ७१ हजार रुपैयाँ रहेको छ । कम्पनीको जगेडा तथा कोषमा ४१ करोड १७ लाख ८७ हजार रुपैयाँ राखेको छ ।
वित्तीय विवरण अुनसार कम्पनीको खराब कर्जा २ प्रतिशत देखिएको छ । जुन गत वर्षको सोही अवधिको तुलनामा खराब कर्जा घटाएको छ । गत वर्षको असोज मसान्तसम्म कम्पनीको खराब कर्जा २.७२ प्रतिशत रहेको थियो ।
कम्पनीको प्रतिसेयर आम्दानी ५८.६२ र प्रतिसेयर नेटवर्थ १९४.६५ रुपैयाँ रहेको छ । कम्पनीले ९१ लाख २३ हजार ९८४.८० रुपैयाँ बराबरको एफपीओ निष्काशन गर्ने भएको हो ।
कम्पनीले प्रतिकित्ता १७७.८० रुपैयाँका दरले ५१ हजार ३१६ कित्ता एफपीओ निष्काशनका लागि धितोपत्र बोर्डमा निवेदन दिएको छ ।
कम्पनीले कात्तिक २३ गते बोर्डमा निवेदन दिएको हो । कम्पनीको एफपीओ निष्कासन तथा बिक्री प्रबन्धकमा नेपाल एसबिआई मर्चेन्ट बैकिङ्ग रहेको छ ।
वि.सं.२०७८ पुस ७ बुधवार १४:०९ मा प्रकाशित