काठमाडौं । भारतले रेगुलेटेड डिजिटल करेन्सी (विद्युतिय मुद्रा) ल्याउने जनाएको छ। मंगलबार भारतीय वित्त मन्त्री निर्मला सितारमणले आगामी वर्षको बजेट संघिय संसदमा प्रस्तुत गर्दै डिजिटल मुद्राको कारोबार गर्ने घोषणा गरेकी हुन् । उनले भारतीय रिजर्भ बैंकले डिजिटल करेन्सी लञ्च गर्ने स्पष्ट पारेकी छिन् ।
भारतीय नागरिकरुको ठूलो रकम विटक्वाइन लगायतका क्रिप्टोकरेन्सीमा लगानी रहेकोले उनीहरुको रकम सुरक्षित गर्नका लागि भारतले विद्युतीय मुद्रा संचालनमा ल्याउन लागेको हो ।
भारतले सुरक्षित लगानीको विकल्पमा विद्युतीय मुद्रा भारतीय रिजर्भ बैंकबाट सन्चालन गर्ने वित्त मन्त्री सितारमणले जानकारी दिइन् । हाल ब्लकचेन प्रविधिमा आधारित क्रिप्टोकरेन्सीमा लगानीलाई भारत सरकारले अवैध मानेको छ।
केन्द्रिय बैंकले ल्याउने विद्युतीय मुद्रा पनि ब्लकचेन प्रविधिमै हुने र सुरक्षित बनाउनका लागि केन्द्रिय बैंकले नियमन गर्ने बताइएको छ। त्यस्तै यस्तो कारोबारमा कर लगाइने पनि वित्त मन्त्री सितारमणले जानकारी दिइन् ।
भारतले आफ्नो देशमा विद्युतीय मुद्रा संचालनमा ल्याउने भएपछि नेपालमा पनि यसको असर पर्ने छ । नेपालमा अधिकांश नीति नियमहरु भारतको नै फोटोकपी गरेको पाइन्छ । अर्कोतिर भारतसँग सिमाना जोडिएको र अधिकांश नेपालीहरु भारतबाट प्रभावित हुने भएकोले नेपालले पनि सो नीति अबलम्वन गरिने पक्का छ ।
पछिल्लो समयमा नेपालमा पनि विद्युतीय मुद्राको कारोबारमा बैधानिकताको माग आइरहेको छ । भारतले कसरी यसको कारोबार र नियमन गर्छ त्यो हेरेर नेपाल राष्ट्र बैंकले नीति ल्याउने नेपाल राष्ट्र बैंकका एक कर्मचारीले बताए ।
वि.सं.२०७८ माघ १८ मंगलवार १५:२३ मा प्रकाशित