काठमाडौं । मैलुङ खोला जलविद्युत कम्पनीले चालु आर्थिक वर्ष २०७८/७९ को दोस्रो त्रैमासिकि वित्तीय विवरण सार्वजनिक गरेको छ ।
कम्पनीले चालु आवको पुस मसान्तसम्ममा नाफा सुधार गरेको छ । गत वर्ष ७१ हजार रुपैयाँ नोक्सानीमा रहेको कम्पनीले यस वर्षको सोही अवधिमा ८३ लाख ४२ हजार रुपैयाँ नाफा गर्न सफल भएको छ ।
उक्त अवधिमा कम्पनीले विद्युत बिक्रीबाट ६ करोड ११ लाख ५७ हजार रुपैयाँ आम्दानी गरेको छ । कम्पनीको यो आम्दानी गत वर्षको पुस मसान्तको तुलनामा भने ८.०३ प्रतिशतले बढी हो । गत वर्षको सोही अवधिमा कम्पनीको यो आम्दानी ५ करोड ६६ लाख ७ हजार रुपैयाँ रहेको छ ।
चालु आवको ६ महिनामा कम्पनीको संचालन मुनाफा भने झिनो वृद्धि अर्थात १.९०प्रतिशतले वृद्धि भई ३ करोड २ लाख ७५ हजार रुपैयाँ पुगेको छ । गत वर्षको सोही अवधिमा कम्पनीको यो मुनाफा २ करोड ९७ लाख ८ हजार रुपैयाँ रहेको थियो ।
कम्पनीको चुक्ता पुँजी ३६ करोड ३० लाख ४७ हजार रुपैयाँ रहेको छ । कम्पनीले जगेडा कोषमा भने उल्लेख गरेको छैन ।
कम्पनीको प्रतिसेयर आम्दानी ४ रुपैयाँ ५३ पैसा र प्रतिसेयर नेटवर्थ १०३ रुपैयाँ २८ पैसा रहेको छ ।
वि.सं.२०७८ फागुन १ आइतवार ०७:१५ मा प्रकाशित