बागलुङ । बागलुङ कालिका मन्दिरको झ्याल, बुइँगल र छानामा रात काट्ने परेवा सुरक्षित बासमा सरेका छन् । परेवाको बध रोकेको मन्दिरले रु दुई लाख ६० हजारको लागतमा एकैसाथ ५५० जोडी परेवा अट्ने सुरक्षित घर ९गन्ज० निर्माण गरिएको छ ।
गुठी व्यवस्थापन समितिका अनुसार सो संरचना बनाउन पशुसेवा कार्यालय बागलुङले रु दुई लाख सहयोग गरेको थियो भने गुठीको आन्तरिक कोषबाट रु ६० हजार खर्च भएको छ ।
आगामी दसैँसम्ममा थप ५५० जोडी परेवाका लागि स्थायी बास निर्माण गरिने समितिले जनाएको छ । सुरक्षित बासस्थानको अभावमा परेवा मन्दिर परिसरमा अलपत्र अवस्थामा देखिने गरेका थिए । गुँड नपाएर परेवा बिरामी हुने, बाहिरी जीवजन्तुको सिकार बन्ने र मन्दिरको छाना फोहोर हुने जस्ता समस्या हटेको छ ।
गुँडमै चारो–पानीका लागि समितिले यथोचित व्यवस्था मिलाएको छ । मनोकाङ्क्षा पूरा हुने विश्वासमा भक्तजनले मन्दिरमा परेवा उडाउने गरेका छन् ।
पछिल्लो समय गाउँघरमा परेवा पाल्ने चलन कम हुँदै गएको बेला मन्दिरले परेवा संरक्षणको काम अघि बढाएको छ ।
२ साउन २०७३, ९।००
वि.सं.२०७३ साउन २ आइतवार १२:३८ मा प्रकाशित