काठमाडौं । नेपाल धितोपत्र बोर्डले स्क्रिन एग्जिविशन कक्ष खुला गर्न निर्देशन दिएको छ । बोर्डले धितोपत्र दलाल व्यवसायीलाई स्क्रिन एग्जिविशन कक्ष खुला गर्न निर्देशन दिएको हो ।
बोर्डले विश्वव्यापी महामारीको रुप लिएको कोभिड–१९ को जोखिमलाई मध्यनजर गर्दै ब्रोकरको कार्यालयमा भीडभाड नहोस् भन्ने अभिप्रायले २०७६ चैतदेखि स्क्रिन एग्जिविशन कक्ष बन्द गराएको थियो ।
दोस्रो बजार कारोबारमा ब्रोकरको डिस्प्ले बन्द गराएर सेयर कारोबार भएको २ वर्षपछि मात्रै अब लगानीकर्ताले डिस्प्ले हेरेर सेयर कारोबारमा संलग्न हुन पाउने भएका हुन् ।
एक सूचना निकाल्दै बोर्डले हाल कोरोना भाइरसको संक्रमण दर न्यून भई नेपाल सरकारले कोरोना भाइरसको जोखिमको समयमा पूर्ण वा आंशिक रुपमा बन्द गरेका अधिकांश क्षेत्रमा प्रतिबन्धात्मक व्यवस्थालाई खुकुलो गरिसकेको जनाएको छ ।
कोभिड–१९ को न्यूनीकरणका लागि तोकिएको सुरक्षा व्यवस्थाहरुको पालना गर्ने÷गराउने गरी धितोपत्र दलाल व्यवसायीहरुको स्क्रिन एग्जिविशन कक्ष सुचारु गर्न बोर्डले सम्पूर्ण धितोपत्र दलाल व्यवसायीहरुलाई निर्देशन दिएको हो ।
यसैवीच बोर्डले कारोबार समयमा नै फ्लोर सिटमार्फत कारोबारमा संलग्न धितोपत्र दलाल व्यवसायी तथा धितोपत्र व्यापारीको क्रम संख्या खुल्ने विवरण प्रवाह हुने भएकाले उक्त विवरण हटाउनका लागि पनि निर्देशन दिएको छ ।
बोर्डले धितोपत्र संचालन नियमावली,, २०६४ को नियम २७ को उपनियम (४) को प्रतिकुल नहुने गरि उक्त विवरण कारोबार समयपश्चात प्रवाह गर्ने व्यवस्था गर्न नेप्सेले निर्देशन दिएको हो ।
वि.सं.२०७९ वैशाख २ शुक्रवार १२:४५ मा प्रकाशित