काठमाडौं । हिमालयन एभरेष्ट इन्स्योरेन्स कम्पनीले ७ करोड नाफा कमाएको छ ।
कम्पनीले सार्वजनिक गरेको गत आर्थिक वर्ष २०७८/७९ को चौंथो त्रैमासिक वित्तीय विवरणले यस्तो देखाएको हो ।
गत आवमा कम्पनीले ७ करोड ५ लाख ५३ हजार रुपैयाँ मात्र नाफा कमाएको छ। जुन अघिल्लो आवको सोही अवधिको तुलनामा ५९.६१ प्रतिशतले कमी हो । अघिल्लो आवमा कम्पनीले १७ करोड ४६ लाख ९७ हजार रुपैयाँ नाफा कमाएको थियो ।
गत आवमा कम्पनीको कुल बीमाशुल्क आर्जन रकम १ अर्ब २० करोड १३ लाख ४० हजार रुपैयाँ रहेको छ । उक्त अवधिमा कम्पनीले १ अर्ब ४ करोड १७ लाख ६६ हजार रुपैयाँ कुल दावी भुक्तानी गरेको छ । गत आवमा कम्पनीको भुक्तानी हुन बाँकी दावी रकम भने १ अर्ब १८ करोड ५३ लाख २३ हजार रुपैयाँ देखिएको छ ।
कम्पनीको चुक्ता पुँजी १ अर्ब २५ करोड ४६ लाख २१ हजार रुपैयाँ रहेको छ । कम्पनीले जगेडा तथा कोषमा भने २१ ८१ लाख ३४ हजार रुपैयाँ राखेको छ ।
कम्पनीको बीमा कोषमा ४४ करोड ७३ लाख ९१ हजार र महा विपत्ति कोषमा २ करोड २३ लाख ९५ हजार रुपैयाँ रहेको छ ।
कम्पनीको प्रतिसेयर आम्दानी ५ रुपैयाँ ६२ पैसा र प्रतिसेयर नेटवर्थ १५४ रुपैयाँ ८३ पैसा रहेको छ ।
हिमालयन जनरल र एभरेष्ट इन्स्योरेन्स एक आपसमा गाभिएपछि हिमालयन एभरेष्ट कम्पनी बनेको हो । यी दुई कम्पनीले गत वैशाख २२ गते एक आपसमा मर्जरमा जान सहमति गरेका थिए । यी दुवै कम्पनी मर्जरमा भई साउन २५ गतेदेखि एकीकृत कारोबार सुरु गरेका छन् ।
वि.सं.२०७९ साउन ३१ मंगलवार १४:४४ मा प्रकाशित
