काठमाण्डौं । अख्तियार दुरुपयोग अनुसन्धान आयोगले त्रिभुवन विश्वविद्यालय अन्तर्गत इन्जिनियरिङ अध्ययन संस्थान पुल्चोकमा कार्यरत प्राध्यापक भरतराज पहारीविरुद्ध सोमबार भ्रष्टचार मुद्दा दायर गरेको छ ।
अख्तियारले प्राध्यापक पहारीले २ करोड ४० लाख १ हजार ५ सय ९९ रुपैयाँ गैरकानुनी रूपमा आर्जन गरेको ठहर गर्दै सोमबार विशेष अदालतमा मुद्दा दायर गरेको हो । अख्तियारले पहारीसँग २ करोड ४० लाख बिगो र बिगोबरावरारको जरिवाना माग गरेको छ । पहारी र निजकी श्रीमती शोभा पहारीको नाममा रहेको स्रोत नखुलेको सम्पत्ति जफत गर्न मागदाबी गर्दै अख्तियारले मुद्दा दायर गरेको हो ।
अख्तियारले प्राध्यापक पहारीले भ्रष्टाचार गरी अकुत सम्पत्ति आर्जन गरेको भन्ने उजुरीका आधारमा उनीविरुद्ध छानबिन थालेको थियो। छानबिनका क्रममा पहारीले राष्ट्रसेवक कर्मचारी रहँदा पेस गरेको सम्पत्तिको विवरण तथा अनुसन्धानको क्रममा गरेको बयानसमेतबाट सम्पत्ति आर्जनको अवैधानिक स्रोत भएको वस्तुनिष्ठ आधारसमेतबाट निजको आयको तुलनामा विद्यमान सम्पत्ति अमिल्दो र अनियमितता पुष्टि भएको ठहर अख्तियारले गरेको छ ।
पहारीविरुद्ध भ्रष्टाचार निवारण ऐन, २०५९ को दफा २० को उपदफा १ बमोजिमको कसुर पुष्टि हुन आएकाले बिगो र बिगोबराबरको जरिवाना र कैद सजाय माग गर्दै मुद्दा दायर गरिएको अख्तियारले जनाएको छ ।
२५ साउन २०७३, १।४०, नयाँ पत्रिका
वि.सं.२०७३ साउन २५ मंगलवार १४:०६ मा प्रकाशित
