काठमाण्डौं । राष्ट्रिय बाणिज्य बैंक र कृषि विकास बैंकको नाफामा उल्लेख्य गिरावट आएको छ । राष्ट्रिय वाणिज्य बैंकको नाफा ४ अर्ब ६४ करोडबाट घटेर दुई अर्ब ६४ करोडमा खुम्चिएको छ । कृषि विकास बैंकको पनि नाफा तीन अर्ब ६० करोडबाट घटेर दुई अर्ब ५७ करोडमा सीमित भएको छ ।
राष्ट्रिय वाणिज्य बैंकले अघिल्लो बर्ष आफ्नो स्वामित्वमा रहेको नेपाल इन्भेष्टमेन्ट बैंकको सेयर बेचेर नाफा साढे चार अर्ब नघाएको थियो । यसपाली भने उसले बैंकिङ कारोवारबाटै साढे दुई अर्ब माथि नाफा गरेको हो । यसपाली उसले ६० करोड रुपैयाँ अतिरिक्त कर्मचारी अवकास सुविधामा छुट्याएकाले खर्च वढेर पनि नाफामा असर देखिएको हो । बैंकले खुद ब्याज आम्दानी चार अर्ब ५९ करोडबाट बढाएर पाँच अर्ब ५४ करोड रुपैयाँ पुर्याएको छ । कर्जा लगानी ७५ अर्ब ८३ करोड रुपैयाँबाट बढाएर ८५ अर्ब ४७ करोड नघाएको छ । बैंकसँग सर्वसाधारणको एक खर्व ४६ अर्ब रुपैयाँ छ ।
कृषि विकास बैंकको नाफा डुबेको ऋण उठेका कारण अघिल्लो बर्ष निकै बढेको थियो । उसले अघिल्लो बर्ष तीन अर्ब ५१ करोड रुपैयाँ राइट ब्याक गरेको थियो । यसपाली ६२ करोड ३७ लाख रुपैयाँ राइट ब्याक गरेको छ । यद्यपी खुद ब्याज आम्दानी भने बैंकले बढाएको छ ।
बैंकले ७९ अर्ब ७५ करोड रुपैयाँ कर्जा लगानी गरेको छ । बैंकसँग सर्वसाधारणको ८७ अर्ब २६ करोड रुपैयाँ निक्षेप छ । बैंकको नाफा घटेका कारण प्रति सेयर आम्दानी ५६ रुपैयाँमा खुम्चिएको छ । बैंकले खराव कर्जा भने ५.३५ प्रतिशतबाट झारेर ३.८५ प्रतिशतमा ल्याएको छ ।
३१ साउन २०७३, ११।००
वि.सं.२०७३ साउन ३१ सोमवार ११:४२ मा प्रकाशित
