काठमाण्डौं । केही महिना अघि अफगानिस्ताको कावुलमा तालिवानको आतंककारी हमलामा परी मृत्यु भएकाका आफन्त र घाईतेहरुले सरकारले अहिलेसम्म पीडितहरुको बारेमा कुनै चासो नदेखाएको आरोप लगाएका छन् ।
आज सोमबार रिपोर्टर्स क्लब नेपालमा उक्त घट्नाका मृत्तकका आफन्त र घाईतेका परिवारले आयोजना गरेको पत्रकार सम्मेलनमा घट्नाका घाईते अमृत रोका क्षेत्रीले आफूहरुलाई सरकारले अहिलेसम्म कुनै ठोस पहल नगरेको गुनासो पोखे । उनले थपे,‘हामी क्यानडा सरकारको लागि काम गर्दा घाईते भयौं, कति साथीहरु वित्नुभयो, तर क्यानडा सरकारसँग क्षतिपूर्ति दिलाउने कुरामा सरकारले अहिलेसम्म ठोस पहलकमदी लिएन, हामीलाई निकै दुःख लागेको छ ।’
त्यस्तै उनले उक्त घट्नामा निधन भएकाहरुलाई ब्रिटिश कम्पनीले पनि ३० हजार डलर मात्रै प्रदान गरेको र घाईतेहरुलाई तीन महिनामात्रै उपचार गरेको बताए । उनका अनुसार उक्त व्रिटिश कम्पनीसँग सन् २०११ मा कामको सिलसिलामा निधन भएमा ३ लाख डलर प्रदान गर्नेवारेमा सम्झौता गरेको थियो । घट्नाका अर्का घाईते मोहन बहादुर थापाले पनि उचित क्षतिपूर्ति र थप ९० दिन उपचार गर्नुपर्ने माग गरे ।
कार्यक्रममा मृत्तक विदुर सुवेदीकी श्रीमती गंगा सुवदीले पनि ३० हजार डलरले मात्रै नपुग्ने बताउँदै क्षतिपूर्तिको रकम थप गर्नुपर्ने बताईन् । उनले भनिन्,‘नेपाल सरकारले हामीलाई कुनै राम्रो व्यवहार नै गरेन, हामीलाई पीडामाथि झन पीडा थप्ने काम गरेको छ, कहिले यहाँ जानुहोस भन्छन्, त कहिले उहाँ जानु भन्छन तर काम केही गर्दैनन्, हामी धाएकै पनि तीन महिना भैसक्यो ।’
कार्यक्रममा क्यानडा मामिलासम्बन्धी प्रमुख दिपकमोहन भट्टराईले मृत्तकका आफन्तलाई र घाईतेहरुलाई क्यानडा सरकारको तर्फबाट थप क्षतिपूर्ति दिलाउन आफू लागिपर्ने विश्वास दिलाए । उनले भने,‘क्यानडा सरकारलाई आग्रह गर्दापनि बेवास्ता गरे, हामी क्यानडामै कानुनी लडाई लड्छौं, पीडितलाई न्याय दिलाएरै छाड्छौं ।’ उनका अनुसार क्यानडाको सत्तारुढ दल लिवरल पार्टीका प्रभावशाली नेता बब रेले निशुल्क कानुनी लडाई लड्ने व्यवस्था गर्नेवारेमा प्रतिबद्धता व्यक्त गरेका छन् ।
१७ असोज २०७३, २।००
वि.सं.२०७३ असोज १७ सोमवार १४:४८ मा प्रकाशित
