भक्तपुर । नेकपा एमालेका नेता एवं पूर्व उद्योग मन्त्री सोमप्रसाद पाण्डेले आफ्नो कार्यकालमा उत्खनन् गर्न थालेको पेट्रोलियम खानी बिदेशीको दवाबमा निरन्तरता नपाएको आरोप लगाएका छन् ।
रफत सञ्चार क्लबले आयोजना गरेको साक्षात्कार कार्यक्रममा बोल्दै पाण्डेले वर्तमान सरकारले बिगत सरकारले कार्यान्वयनमा ल्याएको पेट्रोलियम पर्दाथ उत्खनन् कार्य बिदेशीको दबाबमा ओझेलमा पारेको आरोप लगाएका हुन् । उनले यस अघि सरकारले दैलेख लगायतका केहि जिल्लामा पेट्रोलियम खानीको राम्रो सम्भावना रहेता पनि छिमेकीको परनिर्भरताकै कारण उत्खनन् कार्य रोकिएको बताए ।
पाण्डेले सात प्रदेशमा औद्योगिक क्षेत्र बिस्तारको काम समेत वर्तमान सरकारले अघि नबढाएको गुनासो गर्दै नेपाल र नेपालीको प्रगती औद्योगिकरणमै रहेको तर वर्तमान सरकारले नेपाल र नेपालीको प्रगतीपथलाई रोक्ने काम गरिरहेको टिप्पणी गरे ।
पाण्डेले स्थानिय तहको निर्वाचन गर्ने तर्फ सरकारले चासो नदेखाउनुमा बिदेशीकै इशारा रहेको हुन सक्ने भन्दै अविलम्ब स्थानिय तहको निर्वाचनको वातावरण तयार गरी मिति घोषणा गर्नु पर्ने माग गरे ।
७ माघ २०७३
वि.सं.२०७३ माघ ९ आइतवार ०८:०६ मा प्रकाशित