काठमाण्डौं । एक दर्जन कम्पनीले प्राथमिक र हकप्रद सेयर जारी गर्न लागेका छन् । १२ कम्पनीमा एक कम्पनीले प्राथमिक र अन्य ११ कम्पनी मध्ये कसैले हकप्रद सेयर निष्कासन गरिसकेका छन् भने कोही गर्ने क्रममा रहेका छन् ।
सबैभन्दा पहिले युनाईटेड मोदी हाईड्रोपावर कम्पनीले प्राथमिक सेयर निष्कासन गर्दै छ । कम्पनीले १७ लाख २५ हजार कित्ता प्राथमिक सेयर निष्कासन गर्न लागेको हो । फागुन १९ गते देखि निष्कासन खुल्ला भै छिटोमा फागुन २३ गते निष्कासन बन्द हुने बिक्री प्रबन्धक एनआइबीएल क्यापिटल मार्केट्सले जनाएको छ ।
यसका साथै, ११ कम्पनीले हकप्रद निष्कासन गर्नेमा सबैभन्दा अगाडि देव विकास बैंक रहेको छ । देवले ५० प्रतिशत हकप्रद निष्कासन खुला गरेको छ । माघ ९ गतेदेखि निष्कासन खुला भएको देवको फागुन २७ गतेसम्म हकप्रद भर्ने अन्तिम समय रहेको छ । एनआइबीएल क्यापिटल मार्केट्स मार्फत हकप्रद आवेदन दिन पाइने कम्पनीले जनाएको छ ।
नेको इन्स्योरेन्स लिमिटेडले फागुन ३ गतेदेखि शतप्रतिशत हकप्रद निष्कासन गरेको छ । एनएमबी क्यापिटल मार्फत चैत ७ गतेसम्म आवेदन दिन सकिने कम्पनीले जनाएको छ ।
कैलाश विकास बैंकले साबिक पाँच सेयर बराबर एक सेयर हुने गरी हकप्रद फागुन ६ गतेदेखि निष्कासन गरेको छ । ग्लोबल आइएमई क्यापिटल मार्फत चैत्र १० गतेसम्म आवेदन दिन सकिने बैंकले जनाएको छ ।
हकप्रदको लाइनमा रहेको भार्गब विकास बैंकले फागुन १९ देखि हकप्रद निष्कासन गर्दै छ । साबिक सेयरधनीलाई शतप्रतिशत हकप्रद निष्कासन गर्न लागेको बैंकले चैत्र २८ गते सम्म आवेदन गर्न पाउने जनाएको छ । बैंकको हकप्रदको बिक्री प्रबन्धकमा एनएमबि क्यापिटल रहेको छ ।
हकप्रद निष्कासनकै क्रममा रहेका अन्य कम्पनीमा मिसन डेभलपमेन्ट बैंकले बिभोर क्यापिटल मार्फत शतप्रतिशत हकप्रद निष्कासन गर्दै छ । कुमारी बैंकले ५० प्रतिशत हकप्रद सिदार्थ क्यापिटल मार्फत निष्कासन गर्ने भएको छ ।
डिप्रोक्स लघुवित्त बिकास बैंकले नबिल इन्भेस्टमेन्ट मार्फत शतप्रतिशत हकप्रद निष्कासन गर्दै छ । नेरुड़े लघुवित्त विकास बैंकले ५० प्रतिशत एनसीएम मर्चेन्ट बैंकमार्फत हकप्रद निष्कासन गर्दै छ ।
सिटिजन बैंकले साबिक १० सेयरधनीलाई २।५ प्रतिशतका दरले सानिमा क्यापिटल मार्फत हकप्रद निष्कासन गर्दैछ भने प्रभु इन्स्योरेन्सले प्रभु क्यापिटल मार्फत ५० प्रतिशत हकप्रद दिदैँछ ।
नयाँ सेयरको लाइनमा रहेको स्ट्यान्डर्ड चाटर्ड बैंकले २५ लाख ५८ हजार एकसय ४० कित्ता एफपिओ निष्कासन गर्दै छ ।
१६ फागुन २०७३, १२।००
वि.सं.२०७३ फागुन १६ सोमवार १३:३० मा प्रकाशित
