न्यूयोर्क । यौन शोषणको आरोपमा भारतका २४ वर्षीय एक एथलेट अमेरिकामा पक्राउ परेका छन्। विश्व स्नोसू प्रतियोगितामा भाग लिन गएका भारतीय खेलाडीलाई यही बुधबार अमेरिकी प्रहरीले पक्राउ गरेको हो। तनवीर हुसेन नाम गरेका भारतीय खेलाडीको यौन काण्डको विषयमा गत सोमबार मुद्धा दायर भएको थियो।
न्युयोर्कको सारान्स लेकस्थित एउटा सानो गाउँमा अमेरिकी किशोरी माथि जबरदस्ती यौन सम्बन्ध स्थापित गर्न खोजेका हुसेनविरूद्ध परिवारले उजुरी दिएको थियो। हुसेनले भने आफूले गलत काम नगरेको स्पष्टीकरण दिएका छन्। ‘ऊ निर्दोष छ। कानुनी रुपमा पनि निर्देष देखिन्छ। त्यसैले ऊ गाउँलेहरूको बीचमा देखियो,’ हुसेनका वकिल ब्रायन बारेटले भने।
तनवीर मुलत काश्मिरी हुन्। उनीसँगै यो प्रतियोगिताका लागि आबिद खानलाई पनि नयाँ दिल्ली स्थित अमेरिकी दूतावासले भिषा उपलब्ध गराएको थियो, जतिबेला अमेरिकी राष्ट्रपति डोनाल्ड ट्रम्पले सात मुश्लीम देशका जनतालाई अमेरिका प्रवेशमा रोक लगाएका थिए। हुसेनलाई पहिले भिषा दिन दूतावासले आनाकानी गरेको थियो। तर, कश्मिरी अधिकारी र आयोजकहरूको दबाबका कारण अन्त्यमा उनले भिषा पाएका थिए।
२० फागुन २०७३, ३।३०
वि.सं.२०७३ फागुन २० शुक्रवार १६:३२ मा प्रकाशित
