रैराङ हाइड्रोपावर डेभलपमेन्ट कम्पनीले आज अर्थात जेठ २५ गते देखि आयोजना प्रभावित स्थानीयबासीका लागि सेयर निष्काशन गरेको छ । छिटोमा असार ३ र ढिलोमा असार २३ गते निष्काशन बन्द हुने सेयरमा सिभिल बैंकको फिदिम र थर्पु शाखा, माछापुच्छ्रे बैंक फिदिम, एनआइसी एसिया बैंक फिदिम एवं एनएमबि बैंकको फिदिम र ताप्लेजुङ शाखामा आवेदन दिन सकिनेछ । एक जनाले न्यूनतम ५० कित्ता देखि अधिकतम २८०० कित्तासम्म आवेदन दिन सक्ने कम्पनीको सेयर निष्काशन तथा बिक्री प्रवन्धक एस क्यापिटल लिमिटेडले जनाएको छ ।
कम्पनीले पहिलो चरणमा स्थानीय वासिन्दाका लागि एक सय रुपैयाँ अंकित मूल्यमा पाँच करोड ६० लाख रुपैयाँ बराबरको पाँच लाख ६० हजार कित्ता सेयर जारी गरेको हो । जसमध्ये, दुई लाख २४ हजार कित्ता प्रत्यक्ष प्रभावित पाँचथरको थर्पु र ताप्लेजुङको साब्लाखु गाविसका स्थानीयलाई छुट्याइएको छ भने बाँकी तीन लाख ३६ हजार कित्तामा पाँचथर र ताप्लेजुङका सबै सर्वसाधारणले आवेदन दिन पाउनेछन् । स्थानीयका लागि उक्त १० प्रतिशत सेयर जारी गरिसकेपछि कम्पनीले सर्वसाधारणका लागि १५ प्रतिशत सेयर जारी गर्नेछ ।
लगानीकर्ताले यो आइपीओमा न्यूनतम ५० देखि अधिकतम २८ सय कित्तासम्म आवेदन दिन सक्नेछन् ।
रैराङले पाँचथर र ताप्लेजुङको सिमा क्षेत्रमा ९.९ मेगावाटको इवाखोला जलविद्युत आयोजना निर्माण गरिरहेको छ । आउँदो माघसम्ममा विद्युत उत्पादन सुरु गर्ने लक्ष्य रहेको कम्पनीले जनाएको छ ।
प्रकाशित मितिः २०७४ जेठ २५
वि.सं.२०७४ जेठ २५ बिहीवार १२:०३ मा प्रकाशित