मेलम्ची। बहुप्रतिक्षित मेलम्ची खानेपानी आयोजनाले काठमाडौँवासीलाई खुसी दिए पनि स्थानीयवासीलाई त्रसित बनाएको छ । सुरुङ निर्माणका क्रममा भित्रबाट निकालिएको माटोढुङ्गालाई जथाभावी खोलामा फाल्न थालिए पछि उनीहरुमा त्रास बढेको हो ।
आयोजनाको हेलम्बु गाउँपालिका–१ अम्बाथान सुरुङबाट निस्किएको माटोढुङ्गा (मकिङ) ठेकेदार कम्पनी सिएमसीले जथाभावी खोलामा फाल्न थाले पछि वरपरका बासिन्दा बर्खामा खोला थुनिएर बगाउला कि भन्ने त्रासमा छन् ।
सुरुङ निर्माणको काम छिटोे सक्ने बहानामा ठेकेदार कम्पनी सिएमसीले अव्यवस्थित रुपमा खोलाको मध्य भागसम्म पुग्नेगरी माटोढुङ्गाको पहाड बनाएको छ । यसरी बनेको पहाडमा बर्खामा आउने बाढीले खोला थुनिए किउल, ग्याल्थुम, तालामाराङ र मेलम्चीका स्थानीयवासीलाई प्रभावित गर्नेछ ।
आयोजनाका कारण घरमै पुरिएर मरिने भन्ने त्रास रहेको स्थानीयवासी निमा लामा शेर्पाको भनाइ छ । ।
सुरुङ निर्माण स्थलबाट निस्केका माटोढुङ्गाको उचित व्यवस्थापनको विषयमा स्थानीयस्तरबाट पनि आवाज उठेका छन् ।
स्थानीयवासीलाई आयोजनाका कारण उत्पन्न त्रास हटाउन ठेकेदार पक्ष गम्भीर हुनुपर्छ । त्यसका लागि सबै लाग्न आवश्यक रहेको हेलम्बु गाउँपालिका–१ को वडाध्यक्ष मिङमार लामाको भनाइ छ ।
प्रकाशित मितिः२०७४ जेठ २६
वि.सं.२०७४ जेठ २६ शुक्रवार ०८:१३ मा प्रकाशित
