सिरहा। लामो समयदेखि लथालिङ्ग भएको कमला नहर सिँचाइ योजना निर्माणकार्य दू्रतगतिमा अगाडि बढाइएको छ । विगत तीन वर्षदेखि सिँचाइ मन्त्रालयले योजनावद्ध रुपमा बजेटको व्यवस्था गर्दा कमला नहरको निर्माण कार्य बढाइएको हो ।
सरकारको ढिलासुस्ती र बजेट अभावका कारण २०१७ सालमा तत्कालीन सिँचाइ मन्त्री गणेशमान सिँहले शिलान्यास गर्नुभएको कमला नहर उपेक्षित भएको थियो ।
सिरहाको ४० गाविस र धनुषाका ३६ गाविसमा सिँचाइ गर्ने सरकारी लक्ष्य बजेट अभावका कारण नहर व्यवस्थापन र निर्माण कार्य पूरा नभएको स्थानीय बासिन्दाको भनाइ छ ।
अहिले मूल नहरको लम्बाइ ३० किलोमिटिर, आठ नहर शाखा तथा १७ पुराना शाखा रहेको सो नहरबाट प्रत्येक वर्ष धान र गहुँखेतीका लागि दुई पटक पानी छर्ने गरिएको र आवश्यकता परे पानी छाडिदै आएको डिभिजनका प्रमुख गौतम ठाकुरले बताए ।
कमला नदीको व्यवस्थापन नहुँदा बर्सेनि आउने बाढीले सिरहा, धनुषा र सीमावर्ती क्षेत्र भारतको बिहारमा डुबान हुनुका साथै धनमालको ठूलो क्षति हुने गरेको बताइन्छ ।
नहर सिञ्चित क्षेत्रमा प्रतिकठ्ठा पाँच मन धान र तीन मन गहुँ उत्पादन भइरहेको छ ।
जिल्ला कृषि विकास कार्यालय सिरहाका अनुसार कमला नहरबाट सिँचाइमा धेरै सुविधा पुगेको र यसलाई थप व्यवस्थित गर्नुपर्ने अवस्था रहेको बताइएको छ ।
डिभिजन कार्यालयका अनुसार चालु आर्थिक वर्षमा कमला नहरको वृहत सरकारी सिँचाइ योजनातर्फ रु १७ करोड र मर्मत तर्फ रु दुई करोड निकासा गरिएको छ । समृद्ध तराई– मधेस सिँचाइ कार्यक्रमका लागि रु पाँच करोड विनियोजन भएको र त्यस अनुसार कार्य भइरहेको छ ।
लामो समयदेखि कमला नदीको कटान र डुबानमा पर्दैआएको सिरहा पश्चिम र धनुषाको पूर्वी क्षेत्रमा आवश्यक निर्माण गरी नहर सञ्चालन गरेपछि सिरहा र धनुषाका साढे १२ हजार हेक्टर जमिनमा सिँचाइ सुविधा पुगेको कमला हर्दिनाथ सिँचाइ व्यवस्थापन डिभिजन कार्यालय पोर्ताहाले जनाएको छ ।
प्रकाशित मितिः२०७४ जेठ २७
वि.सं.२०७४ जेठ २७ शनिवार १२:४३ मा प्रकाशित