काठमाडौ । एभरेष्ट ईन्स्योरेन्सले चुक्ता पूँजी बढाउन २० प्रतिशत बोनस सेयर र त्यसपछि ६०० प्रतिशत हकप्रद बिक्री गर्ने भएको छ । एभरेष्ट ईन्स्योरेन्सको असार १ गते बसेको संचालक समिति बैठकले पाँच वटा बार्षिक साधारणसभा अर्थात् १८ औं, १९ औं, २० औं, २१ औं र २२ औं साधारणसभा एकैपटक असार २३ गते आयोजना गर्ने निर्णय गर्दै बोनस तथा हकप्रदको प्रस्ताब गरेको हो ।
कम्पनीले २०७१ चैत्र १२ गतेको साधारणसभाबाट पारित भएको १५० प्रतिशत हकप्रदलाई परिमार्जन गरी ६०० प्रतिशत हकप्रदको प्रस्ताब ल्याएको हो ।
२० प्रतिशत बोनस र त्यसपछिको ६०० प्रतिशत हकप्रदले उसको पूँजी ८४ करोड मात्र पुग्नेछ । बाँकी पूँजी चालु आर्थिक बर्ष र अर्को बर्षको बोनसबाट पुर्याउने लक्ष्य राखेको देखिन्छ । यस पटक घोषणा गरिएको बोनस पाउन र साधारणसभामा भाग दिन असार ८ गतेसम्ममा सेयर किनिसक्नु पर्नेछ ।
हाल १० करोड चुक्ता पूँजी रहेको एभरेष्टको चुक्ता पूँजी बीमा समितिको निर्देशन अनुसार २०७५ असार मसान्तसम्ममा एक अर्ब पुग्नुपर्नेछ ।
बिगत ५ बर्षदेखि कम्पनीको साधारण सभा हुन सकेको थिएन ।एभरेष्ट इन्स्योरेन्स केही बर्ष अघि नक्कली अग्नि बीमा दावी भुक्तानी काण्डले बीमा समितिको कारबाहीमा परे पनि हालैका बर्षहरुमा उसको अबस्था सुधार हुँदै गएको छ ।
प्रकाशित मितिः २०७४ असार २
वि.सं.२०७४ असार २ शुक्रवार १०:२५ मा प्रकाशित
