नयाँदिल्ली । दक्षिणी भारतको तमिल नाडु राज्यमा भएको सडक दुर्घटनामा परी कम्तीमा १० व्यक्तिको मृत्यु भएको छ भने, २३ जना घाइते भएका प्रहरी स्रोतले जनाएको छ ।
यात्रुबहाक बस र स्टील ढुवानी काममा लागेको १ ट्रक आपसमा ठोक्किदा दुर्घटना भएको प्रहरीले शनिबार जनाएको छ ।
तमिल नाडु प्रान्तीय राजधानी चेन्नाइबाट ३ सय ७३ किलोमिटर दक्षिणतर्फ पर्ने थान्जाभुर जिल्लाको भल्लाम इलाकामा सो दुर्घटना भएको बताइएको छ ।
‘गतरात भाल्लाम इलाकामा एउटा ट्रकले यात्रुबहाक बसलाई ठक्कर दिँदा १० जनाको मृत्यु हुनको साथै अन्य २३ जना घाइते भएका छन् प्रहरी अधिकारीले जनाए ।
बसमा सवार कति यात्रुलाई ट्रकले ढुवानी गरेको स्टीलको छडले लागेर चोट लागेको छ , सो प्रष्ट नभएको पनि उनले थप जानकारी दिएको छ ।
राज्यद्वारा सञ्चालित यात्रुबहाक बसमा झण्डै ६० जना स्थानीय यात्रु सवार थिए । मृतक मध्ये ८ जना यात्रु रहेका छन् भने २ जना चालक र उनका सहायक रेहका छन् ।
घाइते भएका सबैलाई थान्जाभुर मेडिकल कलेजको अस्पतालमा भर्ना गरिएको १ जना स्वास्थ्य अधिकारीले जानकारी दिएका छन् । प्रहरीले घटनाका बारेमा अनुसन्धान सुरु गरिसकिएको जनाएको छ ।
घटनाको सत्यतथ्य पत्ता लगाउन छानविन भइरहेको तर प्रारम्भिक विवरण अनुसार तीव्रगतिका कारण दुर्घटना भएको अनुमान पत्ता लागेका प्रहरी अधिकृतले बताएका छन् ।
स्थानीय सरकारले मृतकप्रति श्रद्धाञ्जलि व्यक्त गर्नुका साथै घाइतेको सिघ्र स्वास्थ्य लाभको कामना गरेको छ ।
भारतमा सवारी साधनको कमजोर अवस्था, बिग्रिएको बाटो र ट्राफिक नियमको उलङ्घन लगायतका कारणले धेरै सवारी दुर्घटना हुने गरेका छन् ।
भारतको सडक यातायात मन्त्रालयले सन् २०१५ मा एक लाख ४६ हजार १३३ जनाको सडक दुर्घटनामा परी मृत्यु भएको जनाएको छ । त्यसैगरी ५ लाख २ सय ७९ जना घाइते भएका थिए भने देशभरीमा ५ लाख १ हजार ४ सय २३ वटा दुर्घटना भएको थियो ।
विश्व स्वास्थ्य संगठनले सार्वजनिक गरेको “ग्लोबल रोड सेफ्टी रिपोर्ट २०१५” का अनुसार भारतमा सडक दुर्घटनामा परी वार्षिक औषत २ लाख जनाको मृत्यु हुने गरेको छ । रासस
प्रकाशित मितिः २०७४ असार ३१
वि.सं.२०७४ असार ३१ शनिवार १७:२८ मा प्रकाशित
