काठमाडौँ । नेपाल पर्वतारोहण संघ (एनएमए)को अध्यक्षमा सन्तवीर लामा विजयी भएका छन् । अध्यक्षसहित पदाधिकारीका अधिकांश पदमा लामा समहूका उम्मेद्वारले जित हाँसिल गरेका छन् भने महासचिव शेर्पा प्यानलका उम्मेद्वारले जितेका छन् ।
शनिवार भएको निर्वाचनको करीब राति १२ बजे सार्वजनिक गरिएको मतपरिणाम अनुसार पाँच पदाधिकारी र पाँच सदस्य लामा समूहका उम्मेदवरले जितेको छ भने चार सदस्य सहित महासचिव शेर्पा नेतृत्वको समूहले जितेको छ ।
मतपरिणाम अनुसार जिम्बाजाङबु शेर्पालाई ६७ मतले पराजित गर्दै लामा विजयी भएका हुन् । उनले ३८३ मत प्राप्त गरे भने शेर्पाले ३१६ मत ल्याए । त्यस्तै, प्रथम उपाध्यक्षमा लामा समूहकै दिवश विक्रम शाह ३७० मत हाँसिल गरी विजयी भए भने उनका निकटतम प्रतिद्धन्दी भूमि लामाले ३१० मत ल्याए । द्वितीय उपाध्यक्षमा पनि लामा समुहकै माया शेर्पा विजयी भइन् उनले ३८४ मत ल्याइन् भने उनकी निकटतम प्रतिद्धन्दी निमी शेर्पाले २९८ मत प्राप्त गरिन् ।
महासचिवमा भने शेर्पा समूहका उम्मेद्वार कुलबहादुर गुरुङले जित हाँसिल गरेका छन् उनले ३९१ मत प्राप्त गरी विजय हासिल गरे भने उनका प्रतिद्वन्द्वी बोधराज भण्डारीले २९१ मत ल्याए । त्यस्तै, सचिवमा पनि लामा समुहकै टिकाराम गुरुङले ३५० मत ल्याई विजय हासिल गर्दा उनका प्रतिद्वन्द्वी पी छेवाङ शेर्पाले ३२१ मत प्राप्त गरे । कोषाध्यक्षमा पनि लामा समुहबाटै उम्मेद्वार सुदर्शन न्यौपाने विजयी भएका छन् । उनले ३३२ मत ल्याए भने विमल नहर्कीले ३२० मत हात पारे ।
कार्यसमिति सदस्यहरुमा मिश्रित परिणाम आएको छ । नौ जना सदस्यहरुमा लामा समूहले ५ र शेर्पा समूहले ४ सदस्यमा जित हात पारेका छन् । जस्मा, लामा समुहबाट पासाङ तेण्डी शेर्पा, सिंगी लामा, मिङमार शेर्पा, विनय शाक्य, र सञ्जिव गुरुङले जित हात पारे । शेर्पा, लामा, शेर्पा, शाक्य र गुरुङले क्रमशः ३६४, ३२७, ३५२, ३५७ र ३२१ मत प्राप्त गरेका छन् । उता, शेर्पा समूहबाट सदस्यहरुमा डा। हरि प्रसाद श्रेष्ठ, आङछेवाङ शेर्पा, दा ग्याल्जेन शेर्पा र तुल्सिङ गुरुङ निर्वाचिन भए । उनीहरुले क्रमशः ३५३, ३३२, ३३६ र ३६४ मत प्राप्त गरेका छन् । एनएमएमा १ हजार ३९ मतदाता रहेकोमा ७५६ मत खसेको थियो ।
वि.सं.२०७४ साउन २२ आइतवार ०७:४० मा प्रकाशित