काठमाडौ । नेपाल हाइड्रो डेभलपरको आज अर्थात् शुक्रबारदेखि आइपीओ बिक्री खुला भएको छ । कम्पनीले १०० रुपैंया अंकित ३ करोड ९० लाख रुपैयाँको अर्थात् ३ लाख ९० हजार कित्ता आइपीओ खुला गरेको हो ।
आइपीओको २ प्रतिशत सेयर कर्मचारीलाई छुट्याइएको छ । यसआधारमा कर्मचारीले ७ हजार ८०० सय कित्ता सेयर पाउनेछन् । त्यस्तै, सामूहिक लगानी कोष कम्पनीहरुले ५ प्रतिशत अर्थात् १९ हजार ५०० कित्ता सेयर पाउनेछन् । यो आइपीओमा न्यूनतम ५० कित्ता र अधिकतम १ हजार कित्तासम्म आवेदन दिन पाइनेछ ।
यसमा बिक्री प्रबन्धकको काम एनएमबि क्यापिटलले गर्नेछ । लगानीकर्ताले एनएमबि क्यापिटल लिमिटेड नागपोखरी काठमाडौ, नेपाल हाइड्रो डेभलपरको कार्यालय डिल्लीबजार काठमाडौंमा गएर आवेदन दिन सक्नेछन् । यसबाहेक आस्वा अनुमति लिएका जुनसुकै बैंक तथा वित्तीय संस्थाबाट पनि सेयर भर्न सकिनेछ । कम्पनीको साधारण सेयरमा साउन ३२ गतेसम्म आवेदन गर्न सकिन्छ ।
कम्पनीले दोलखा जिल्लामा ३.५२ मेगावाटको चर्नावती हाइड्रोपावर सञ्चालन गर्दै आएको छ । धितोपत्र बोर्डले सकेसम्म सबैलाई न्यूनतम १० कित्ता सेयर दिनैपर्ने बाध्यकारी व्यवस्था गरेकाले आवेदकले सेयर भर्दा ठूलो रकम खर्च गर्नु पनि पर्दैन र सबैलाई पर्दछ ।
आस्वा अनिवार्य भएकाले सबैले आस्वा सदस्यता लिएका बैंक तथा वित्तीय संस्थाबाट सेयर भर्नुपर्ने हुन्छ । आफ्नो खाता भएको अनि आस्वाको सदस्य पनि भएका बैंकबाट आइपीओ भर्न मिल्छ ।
हाइड्रोले यसअघि मंसिर २६ गतेदेखि पुस १० गतेसम्म दोलखाका आयोजना प्रभावित स्थानीयबासीलाई दुई लाख ६० हजार कित्ता साधारण सेयर बिक्री गरि बाँडफाँड गरिसकेको छ ।
प्रकाशित मितिः २०७४ साउन २७
वि.सं.२०७४ साउन २७ शुक्रवार १०:५८ मा प्रकाशित
