काठमाडौ । पढ्ने इच्छा र चाहनालाई उमेरले छेक्दैन भन्ने कुराको एउटा सशक्त उदाहरण बनेकी छिन् नायिका करिश्मा मानन्धर । धेरैलाई अचम्म लाग्न सक्छ तर लामो समयदेखि फिल्मी क्षेत्रमा काम गरिसकेकी ४३ बर्षीया करिश्मा मानन्धर हाल कक्षा नौ मा अध्ययन गरिरहेकी छिन् ।
कक्षा आठ पास गरेपछि १४ वर्षको उमेरदेखि नै फिल्म क्षेत्रमा अभिनय सुरु गरेकी करिश्मा अहिले मैतिदेवीस्थित त्रिवेणी पब्लिक स्कुलमा कक्षा ९ मा अध्ययन गरिरहेकी छिन् । उनले नयाँ शक्ति नेपालको समारोहमा यो कुरा बताएकी हुन् ।
हाल बाबुराम भट्टराई नेतृत्वको नयाँ शक्ति पार्टीमा आवद्ध करिश्माले राजधानीमा आयोजित एक कार्यक्रममा बोल्दै भनिन्, ‘म पुनः नियमित अध्ययनमा लागेकी छु । नियमित कक्षामा जान त सक्दिन तर अध्ययन भने त्रिवेणीमा गर्न थालेकी छु । तर सिनेमामा त मैले पिएचडी नै पास गरेको छु जस्तो लाग्छ । ’
नयाँ शक्ति पार्टी नेपालका संयोजक डा। बाबुराम भट्टराईले आर्यघाटमा नपुग्दासम्म सिक्ने र पढ्ने कुरा जारी रहने भन्दै करिश्मा मानन्धरले स्कुल भर्ना हुनु कुनै नौलो कुरा नभएको बताए । करिश्माकी छोरी कविता अहिले अमेरिकाबाट ग्राजुएट गर्दैछिन् ।
प्रकाशित मितिः२०७४ भदौ २०
वि.सं.२०७४ भदौ २० मंगलवार १६:३१ मा प्रकाशित