बेइजिङ। चीनले उत्तर कोरियामा गर्ने पेट्रोलियम पदार्थको निर्यात घटाएको छ। चीनले अक्टोबरको सुरुदेखि नै निर्यात कम गर्ने यसअघि जनाएको थियो।
यसैगरी संयुक्त राष्ट्रसंघीय सुरक्षा परिषद्ले उत्तर कोरियाद्वारा निरन्तर गर्दै आएका आणविक अस्त्र परीक्षणलाई लिएर आर्थिक प्रतिबन्ध लगाएको छ। सोही नाकाबन्दी स्वरुप चीनले उत्तर कोरियामाथि प्रतिबन्ध कडापार्दै उक्त निर्णय गरेको हो। त्यसैगरी उत्तर कोरियाबाट आफूले गर्ने कपडाको आयात पनि बन्द गरिएको घोषणा गरेको छ।
संयुक्त राष्ट्रसंघले तयार पारेको चीन र उत्तर कोरियाबीचको भन्सार तथ्याङ्कअनुसार सन् २०१६ मा चीनबाट प्रतिदिन छ हजार ब्यारेल इन्धन उत्तर कोरिया निर्यात गरिएको थियो। तर चीनले सन् २०१४ पछि उत्तर कोरियालाई दिने गरेको इन्धनको तथ्याङ्क सार्वजनिक नगरेका कारण इन्धन निर्यातको वास्तविक तथ्याङ्क भने सार्वजनिक हुन सकेको छैन।
शुरुमा वासिङ्टनले उत्तर कोरियामाथि पूर्णप्रतिबन्ध लगाउन आग्रह गरे पनि चीन र रुसको समर्थन लिन पछि उक्त अडानमा अमेरिका केही लचिलो बनेको हो। यसअघि उत्तर कोरियालाई चीनले सहयोग गर्दै आएको आरोप अमेरिकाको थियो। अमेरिकाले चीन उत्तर कोरियाको प्रमुख व्यापार सहयोगी रहेको र यी दुई देशबीच ठूलो मात्राको आर्थिक क्रियाकलाप हुने गरेको बताउदै आएको छ।
पछिल्लो समयमा उत्तर कोरियाले शक्तिशाली आणविक परीक्षण गर्दै आएको छ। ती परीक्षणबाट विश्वमा हतियारको होडबाजी सुरु हुने त्रास बढ्दै गएको बताएको छ। रासस/एएफपी
प्रकाशित मितिः २०७४ असोज २०
वि.सं.२०७४ असोज २० शुक्रवार १२:१२ मा प्रकाशित
