काठमाडौं। भिन्न दुई कम्पनी एक आपसमा गाभिएर बनेको एनआइबिएल एस क्यापिटल लिमिटेडले आइतबारबाट एकीकृत कारोबार थाल्ने भएको छ । एनआइबिएल क्यापिटल मार्केट्स लिमिटेड र एस क्यापिटल लिमिटेडले एक आपसमा गाभ्ने र गाभिने (मर्जर)को प्रक्रिया पुरा गरी नयाँ नामबाट कारोबार सुरु गर्ने भएका हुन् ।
मर्जरपछि यस कम्पनीको चुक्ता पूँजी २७ करोड रुपैयाँ पुगेको छ। मर्जरपछि बनेको संस्था सबैभन्दा धेरै चुक्ता पूँजी भएको धितोपत्र व्यवसायी (मर्चेन्ट बैंकर) बनेको छ। कम्पनीले अहिले ३८ वटा कम्पनीको शेयर रजिष्ट्रारको काम गर्दै आएको छ। यो कार्यमार्फत करिब १० लाख शेयरधनीलाई सेवा प्रदान हुने कम्पनीले जनाएको छ।
दुई कम्पनीबीच गत कात्तिक २३ गते एक आपसमा गाभ्ने गाभिने सहमति भएको थियो। त्यही सहमतिअनुसार मंसिर २९ गते सम्पन्न छट्टाछुट्टै विशेष साधारणसभाले मर्जरको प्रस्ताव पारित गरेको थियो।
कम्पनीको १ लाख ४२ हजार भन्दा धेरै हितग्राही खाता र ४ वटा शाखा कार्यालय हुनेछन्। कम्पनीले थप तीन शाखा विस्तारको तयारी गरेको छ।
२०७४ माघ २८ गते प्रकाशित
वि.सं.२०७४ माघ २८ आइतवार ०९:१४ मा प्रकाशित
