दाङ । लमही नगरपालिका वडा नं ५ टिकुलीगढका अम्मरबहादुर तामाङले व्यावसायिक माछापालन गरेर वर्षमा ४० लाख आम्दानी गरेका छन् ।
उनले आठ बिघा जग्गामा आठ वटा पोखरी निर्माण गरी माछापालन गरिरहेका छन् । विगत आठ वर्षदेखि व्यावसायिक रुपमा माछापालन गर्दै आएका तामाङ अहिले माछा र माछाको भुरा उत्पादन गरेर वार्षिक रु ४० लाख आम्दानी गर्छन् । तामाङले अहिले स्थानीय सातजनालाई रोजगारीसमेत दिएका छन् ।
माछापालनबाट अहिले वार्षिक रुपमा रु ४० लाख आम्दानी भए पनि सबै खर्च कटाएर वार्षिक रु २० लाख मात्र बचत हुने गरेको तामाङले बताए ।
शुरुमा धान, गहुँ राम्रोसँग उत्पादन हुने जग्गामा माछापालनका लागि पोखरी निर्माण गर्दा उनलाई गाह्रो भने नभएको होइन । गाउँ, समाज र घर परिवारबाट खेतीयोग्य जमिनलाई खनेर खाल्टो पार्दा बौलाउन थालेछ भन्नेहरु अहिले आफ्नो प्रशंसक भएको उनको भनाइ छ ।
यो वर्ष मात्रै २०० क्विन्टल भन्दा बढी माछा बिक्री भएको तामाङले बताए । त्यहाँ उत्पादन भएका माछा जिल्लाका विभिन्न बजारमा बिक्रीका लागि लैजाने गरिन्छ । प्रतिकेजी रु २२० देखि २५० सम्मका दरले माछा बिक्री हुने गरेको उनी बताउँछन् ।
२०७४ फागुन १३ गते प्रकाशित
वि.सं.२०७४ फागुन १३ आइतवार १५:४२ मा प्रकाशित
