काठमाडौं । नव नियुक्त पर्यटन मन्त्री रविन्द्र अधिकारीले आफ्नो कार्यकालमै पर्यटन विश्वविद्यालय स्थापना गर्न तत्पर रहेको बताएका छन् ।
नेपाल राष्ट्रिय पर्यटन व्यवसायी संगठनद्वारा सनिबार काठमाडौँमा आयोजित संघीय सरकारका नवनियुक्त पर्यटन मन्त्री राविन्द्र अधिकारी र ३ नम्बर प्रदेश सरकारका पर्यटन मन्त्री अरुण नेपालको स्वागत कार्यक्रममा उनले सो कुरा बताएका हुन् ।
मन्त्री अधिकारीले भने ‘पर्यटन व्यवसायमा राम्रो जनशक्तीको अभाव छ । सीप नहुँदा बेरोजगार बढेको हो ।’
भाषामा पर्यटनको एजेण्डा र विजनेश जोड्नु पर्छ भन्दै मन्त्री अधिकारीले भने मध्यमखालको जनशक्ती उत्पादन गर्नुपर्छ । यसको लागि सिटिइभिटी र नाथमले यो काम ३ महिना भित्रै कोर्स बनाएर काम थालनी गर्न सक्छ ।
सीप भए जहाँ पुगे पनि राम्रो आम्दानी गर्न सक्ने बताउँदै उनले भने ‘पढाउने र सीप क्षमता विकास गर्नेमा लगानी नगर्ने उपलव्धि मात्रै खोज्ने हो भने संसारका कुनै पनि देशले विकास गर्न सक्दैन ।’ रोजगारीले नै मानिसको जीवन समृद्ध बनाउने उनको धारणा थियो ।
मन्त्री अधिकारीले मुलुकको समृद्धि र बलियो अर्थतन्त्रका लागि पुर्वाधार भनिएपनि सीप र क्षमता त्यो भन्दा उन्नत हुने बताए । उनले अब रेमिट्यान्स घट्यो भनेर चिन्ता गर्ने हैन त्यसको कभर पर्यटनले गर्नु पर्छ ।
हेर्नुहोस भिडियो
सोही कार्यक्रममा ३ नम्बर प्रदेश सरकारका पर्यटन मन्त्री अरुण नेपालले समृद्धिको न्यायपुर्ण वितरमा जोड दिइने बताए । उनले पर्यटनलाई जनतासंग जोड्नु पर्ने धारणा राख्दै होमस्टे प्रवद्र्धनमा लगानी गरेर ग्रामीण जनताको आर्यआर्जन बृद्धि गर्ने बताए । प्रदेशमा कानुन नभएकाले अवसर र चुनौति दुवै रहेको उनको धारणा थियो ।
कार्यक्रममा नेकपा एमालेका केन्द्रीय सदस्य एवं पर्यटन सम्बद्ध संगठनका इञ्चार्ज सूर्य थापाले अव ओठेभक्तिले मात्र समृद्धि हासिल नहुने बताए । उनले गरेर देखाउने बेला आएको बताउँदै यो दुई तिहाई बहुमतको सरकारले १० वर्षमा ५० लाख पर्यटक भित्र्याउने संकल्प पुरा गर्ने विश्वास व्यक्त गरे ।
थापाले पर्यटन क्षेत्रमा मीठो कुरा गरेर ठग्नेहरुबाट जोगिन मन्त्रीहरुलाई सुझाव दिए । उनले भने यहाँ ठगहरु पनि छन्, तिनले ल्याएका सबै काम विचार नगरी पुरागरिदिने नगर्नुहोला ।
इञ्चार्ज थापाले पर्यटनमा खास समस्या पर्यटन बसपार्कको अभाव, गाइड विनाको ट्रेकिङ र केही हिमाललाई निशेधित क्षेत्र तोकिएका बताए । उनले सरकारले पर्यटन सवारीका लागि छुट्टै व्यवस्थित बसपार्क, नो ट्रेकिङ विथआउट गाइड तथा पोर्टर र निशेधित क्षेत्र खुलाएर सहजता ल्याउन तत्कालै कदम चाल्न अनुरोध गरे ।
उनले एमालेबाट दशौं पर्यटन मन्त्रीका रुपमा नियुक्त भएका अधिकारीलाई दशकको झल्को दिनेगरी काम गर्न शुभकामना दिए ।
कार्यक्रममा नेकपा एमाले पर्यटन प्रवद्र्धन विभागका सचिव चन्द्रप्रसाद रिजाल, नाट्टाका अध्यक्ष सिएन पाण्डे लयायतले नवनियुक्त मन्त्रीहरुलाई शुभकामना दिए ।
संठनका अध्यक्ष मदन आचार्यको अध्यक्षतामा सम्पन्न कार्यक्रम संगठनका महासचिव पुर्णबहादुर कुँवरले सञ्चालन गरेका थिए ।
२०७४ चैत ३ गते प्रकाशित
वि.सं.२०७४ चैत ४ आइतवार ०९:२८ मा प्रकाशित
