काठमाडौं । सेयर बजार मापक नेप्से एकपछि अर्को दिन गर्दै बढ्दै जान थालेको छ । कारोबार रकम पनि प्रत्येक दिन अर्ब रुपैयाँ भन्दा माथि हुन थालेको छ । सेयर बजार अझै उच्चाइमा पुग्ने संकेत यसले देखाएको छ । यसअघि १८८१ बिन्दुको उचाइमा पुगेको नेप्से पछिल्लो समय ११ सयको हाराहारीमा झरेको थियो । तर, अहिले निरन्तर रुपमा बढेको छ । मंगलबार मात्र २२.३७ बिन्दुले नेप्से उकालो लागेर १२८०.०५ बिन्दुमा पुगेको छ ।
नेप्सेसँगै कारोबार रकममा पनि सुधार आएर १ अर्ब १२ करोड भएको छ । लगानीकर्ताहरु यसलाई सुभ संकेतका रुपमा लिएका छन् । बैंक तथा वित्तीय संस्थाले गत आर्थिक वर्षको लाभांशबाट धमाधम लाभांश घोषणा गर्न थालेपछि सेयर बजारमा चहल पहल बढेको ब्रोकरको भनाइ छ । सेयर बजार ओरालो लागेसँगै सुनसान बन्दै आएका ब्रोकर कम्पनीको कार्यालयमा फेरी लगानीकर्ताको बाक्लो देखिएको छ । लगानीकर्ताहरु लाभांश बढी दिन सक्ने सम्भावना भएका कम्पनीको सेयर खोजी खोजी खरिद गर्न थाल्दा सेयर बजार मापक नेप्से पनि पछिल्लो समय उकालो लाग्दै गएको छ ।
बैंकले सेयर धितोमा दिने कर्जाको ब्याजदर घटाउँदै गएकाले पनि सेयर बजारमा सुधार आएको ब्रोकर बताउँछन् । १५ प्रतिशतसम्म सेयरधितोमा कर्जा प्रवाह गर्दै आएका बैंक तथा वित्तीय संस्थाले अहिले १० प्रतिशतको हाराहारीमा ऋण दिन थालेका छन् । यसले पनि सेयर बजार उकालो लाग्न थालेको हो । बैंकले सर्वसाधारणले बैंकमा पैसा राख्दा पाउने ब्याज घटाएका छन् । बैंकमा पैसा राख्नु भन्दा सेयरमा लगानी गर्दा फाइदा हुने सम्भावना देखिन थालेकाले पनि सेयर बजार बढन पुगेको कतिपयको भनाइ छ । केही समय अघि मुद्दती खातामा पैसा राख्दा ११ प्रतिशतसम्म ब्याज पाउथे । तर, अहिले बैंकमा मुद्दती खातामा पैसा राख्न जानेलाई बढीमा १०.५० पैसा मात्र दिन थालेका छन् ।
यसैगरी, बचत खातामा पनि ८ प्रतिशत ब्याज पाउँदै आएका सर्वसाधारणले अब ७ प्रतिशत मात्र पाउने भएका छन् । त्यही पनि सवैभन्दा पछि खुलेका सिभिल, सेञ्चुरी, मेगा, जनता लगायतका वाणिज्य बैंकले मात्र बढी ब्याज दिने गरेका छन् । तर, पुराना बैंक स्टयाण्डर्ड चार्टर्ड, नविललगायतका बैंकले भने ३ देखि ४ प्रतिशत मात्रै ब्याज दिन थालिसकेका छन् । जहिले पनि बैंकको ब्याजदर र सेयर बजारको उल्टो सम्बन्ध हुन्छ । ब्याजदर बढ्दा सेयर बजार घट्न पुग्छ भने ब्याजदर घट्दा सेयर बजार बढन पुग्छ ।
लगानीयोग्य पुँजी (तरलता) नभएपछि बैंकले धमाधम ब्याजदर बढाएका थिए । तर, अहिले भने केही सहज भएको भन्दै बैंकले पुन ब्याजदर घटाएका छन् । ब्याजदर अझै पनि घट्ने अनुमान गरिएको बैंकर बताउँछन् । बैंकको ब्याजदर अझै घट्ने हो भने सेयर बजार अझै उचाइमा पुग्ने लगानीकर्ताको भनाइ छ ।
२०७५ असोज १० गते प्रकाशित
वि.सं.२०७५ असोज १० बुधवार ०९:४४ मा प्रकाशित
