काठमाडौं । मुलुकभर ५ खर्ब ३ अर्ब २५ करोड रुपैयाँ बराबरको नोट चलनचल्तीमा रहेका छन । नेपाल राष्ट्र बैंकको तथ्यांक अनुसार नेपालमा कागजी मुद्राको प्रचलन भएदेखि २०७६ असार मसान्तसम्म आइपुग्दा ५ खर्ब ७ अर्ब ६ करोड रुपैयाँ भन्दा बढी परिणामको नोट बजारमा पठाइसकिएको छ ।
त्यस्तै गत असार मसान्तसम्ममा ३ अर्ब ८० करोड ९८ लाख रुपैयाँ भन्दा बढी रुपैयाँ बैंकिङ अफिसमा नोट मौज्दात रहेको केन्द्रीय बैंकले जानकारी दिएको छ । जम्मा इक्विटी तथा दायित्व ५ खर्ब ६७ अर्ब ५४ करोड ६९ लाख रुपैयाँ रहेको छ ।
आर्थिक गतिविधिको विस्तारसँगै मुद्राको चलनचल्ती बढ्दै गएको र अर्थतन्त्रको मौद्रिकीकरणमा सुधार भइरहेकाले मुद्राको सहज आपूर्ति गर्दै आएको केन्द्रीय बैंकको भनाई छ ।
मुलुकभर नेपाली नोटको सहज व्यवस्था गर्न कम्तीमा ३ वर्ष ३ महिनाका लागि धान्ने नोट स्टक राख्ने नीतिगत व्यवस्था छ । नेपालमा वि.सं २००२ असोजबाट कागजी नोटको प्रचलन सदरमुलुकी खानाबाट सुरु भएको हो ।
नोट छाप्दा देशको आर्थिक वृद्धिदर, मुद्रास्फितिको दर, बजेटको आकार, सर्कुलेसन ट्रेण्ड, विनिमय दरको अवस्था, डिजिटल पेमेन्टको अवस्था, विप्रेषणको प्रवाह, भुक्तानी सन्तुलन लगायत मापदण्डलाई हेर्ने गरिन्छ ।
२०७६ साउन २६ गते प्रकाशित
वि.सं.२०७६ साउन २६ आइतवार ०८:२९ मा प्रकाशित
